The Great Hoos :: Ⲡⲟ̅ⲥ̅ ⲁⲓⲱϣ ⲟⲩⲃⲏⲕ ⲥⲱⲧⲉⲙ ⲉ̀ⲣⲟⲓ :: الهوس الكبير للعيد

Ⲡⲟ̅ⲥ̅ ⲁⲓⲱϣ ⲟⲩⲃⲏⲕ ⲥⲱⲧⲉⲙ ⲉ̀ⲣⲟⲓ: ⲙⲁϩ̀ⲑⲏⲕ ⲉ̀ⲧ̀ⲥⲙⲏ ⲛ̀ⲧⲉ ⲡⲁϯϩⲟ ⲉ̀ⲡ̀ϫⲓⲛⲧⲁⲱϣ ⲉ̀ⲡ̀ⲱϣⲓ ϩⲁⲣⲟⲕ: ⲙⲁⲣⲉⲥⲥⲱⲟ̀ⲩⲧⲉⲛ ⲙ̀ⲡⲉⲕⲙ̀ⲑⲟ ⲛ̀ϫⲉ ⲧⲁⲡ̀ⲣⲟⲥⲉ̀ⲩⲭⲏ. Ⲁⲗⲗⲏⲗⲟⲩⲓⲁ.

Ⲡ̀ϧ̀ⲣⲱⲟ̀ⲩ ⲙ̀Ⲡⲟ̅ⲥ̅ ϩⲓϫⲉⲛ ⲛⲓⲙⲱⲟ̀ⲩ: Ⲫϯ ⲛ̀ⲧⲉ ⲡ̀ⲱ̀ⲟ̀ⲩ ⲁϥⲉ̀ⲣϧⲁⲣⲁⲃⲁⲓ: Ⲡⲟ̅ⲥ̅ ϩⲓϫⲉⲛ ϩⲁⲛⲙⲱⲟ̀ⲩ ⲉⲩⲟϣ. Ⲁⲗⲗⲏⲗⲟⲩⲓⲁ.

Ⲡ̀ϧ̀ⲣⲱⲟ̀ⲩ ⲙ̀Ⲡⲟ̅ⲥ̅ ϧⲉⲛ ⲟⲩϫⲟⲙ: ⲡ̀ϧ̀ⲣⲱⲟ̀ⲩ ⲙ̀Ⲡⲟ̅ⲥ̅ ϧⲉⲛ ⲟⲩⲛⲓϣϯ ⲙ̀ⲙⲉⲧⲥⲁⲓⲉ̀: ⲡ̀ϧ̀ⲣⲱⲟ̀ⲩ ⲙ̀Ⲡⲟ̅ⲥ̅ ⲉϥⲉ̀ⲥⲟⲃϯ ⲛ̀ϩⲁⲛⲉ̀ⲓⲟⲩⲗ: ⲟⲩⲟϩ ϥ̀ⲛⲁϭⲱⲣⲡ ⲛ̀ϩⲁⲛⲓⲁϩϣ̀ϣⲏⲛ ⲉ̀ⲃⲟⲗ. Ⲁⲗⲗⲏⲗⲟⲩⲓⲁ.

Ϧⲉⲛ ⲡ̀ⲥⲁϫⲓ ⲙ̀Ⲡⲟ̅ⲥ̅ ⲁⲩⲧⲁϫⲣⲟ ⲛ̀ϫⲉ ⲛⲓⲫⲏⲟⲩⲓ̀ ⲟⲩⲟϩ ⲛⲟⲩⲇⲩⲛⲁⲙⲓⲥ ⲧⲏⲣⲟⲩ ⲉ̀ⲃⲟⲗ ϩⲓⲧⲉⲛ ⲡⲓⲡ̀ⲛⲉⲩⲙⲁ ⲛ̀ⲧⲉ ⲣⲱϥ. Ⲁⲗⲗⲏⲗⲟⲩⲓⲁ.

Ⲫⲏⲉ̀ⲧⲑⲱⲟ̀ⲩϯ ⲛ̀ⲛⲓⲙⲱⲟ̀ⲩ ⲛ̀ⲧⲉ ⲫ̀ⲓⲟⲙ ⲙ̀ⲫ̀ⲣⲏϯ ⲛ̀ⲟⲩⲁ̀ⲥⲕⲟⲥ: ⲟⲩⲟϩ ⲁϥⲭⲱ ⲛ̀ⲛⲓⲛⲟⲩⲛ ϧⲉⲛ ϩⲁⲛⲁ̀ϩⲱⲣ. Ⲁⲗⲗⲏⲗⲟⲩⲓⲁ.

Ϯⲛⲁⲉ̀ⲣⲡⲉⲕⲙⲉⲩⲓ̀ Ⲡⲟ̅ⲥ̅ ϧⲉⲛ ⲡ̀ⲕⲁϩⲓ ⲛ̀ⲧⲉ ⲡⲓⲒⲟⲣⲇⲁⲛⲏⲥ ⲛⲉⲙ Ⲉⲣⲙⲱⲛⲓⲙ ⲉ̀ⲃⲟⲗ ϧⲉⲛ ⲡⲓⲕⲟⲩϫⲓ ⲛ̀ⲧⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲫ̀ⲛⲟⲩⲛ ⲁϥⲙⲟⲩϯ ⲟⲩⲃⲉ ⲫ̀ⲛⲟⲩⲛ ⲉⲩⲥ̀ⲙⲏ ⲛ̀ⲧⲉ ⲛⲉⲕⲕⲁⲧⲁⲣⲁⲕⲧⲏⲥ: ⲛⲉⲕⲣⲱⲟ̀ⲩϣ ⲧⲏⲣⲟⲩ ⲛⲉⲙ ⲛⲉⲕϫⲟⲗ ⲁⲩⲓ̀ ⲉ̀ϩ̀ⲣⲏⲓ ⲉ̀ϫⲱⲓ. Ⲁⲗⲗⲏⲗⲟⲩⲓⲁ.

Ⲁⲩⲱϣ ⲟⲩⲟϩ ⲁⲩϣ̀ⲑⲟⲣⲧⲉⲣ ⲛ̀ϫⲉ ⲛⲓⲙⲱⲟ̀ⲩ: ⲁⲩϣ̀ⲑⲟⲣⲧⲉⲣ ⲛ̀ϫⲉ ⲛⲓⲧⲱⲟ̀ⲩ ϧⲉⲛ ⲡⲉϥⲁ̀ⲙⲁϩⲓ: ⲛⲓⲟⲩⲟ̀ⲓ ⲛ̀ⲧⲉ ⲫ̀ⲓⲁⲣⲟ ⲥⲉⲑ̀ⲣⲟ ⲛ̀ⲑ̀ⲃⲁⲕⲓ ⲙ̀Ⲫϯ ⲟ̀ⲩⲛⲟϥ. Ⲁⲗⲗⲏⲗⲟⲩⲓⲁ.

Ⲫⲏⲉ̀ⲧϣ̀ⲑⲟⲣⲧⲉⲣ ⲛ̀ϯⲟⲩⲏ̀ϣⲥⲓ ⲛ̀ⲧⲉ ⲫ̀ⲓⲟⲙ ⲛⲉⲙ ⲧ̀ⲥ̀ⲙⲏ ⲛ̀ⲧⲉ ⲛⲉϥϩⲱⲓⲙⲓ: ⲫ̀ⲓⲁⲣⲟ ⲛ̀ⲧⲉ Ⲫϯ ⲁϥⲙⲟϩ ⲙ̀ⲙⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲛ̀ⲑⲟⲕ ⲁⲕⲧⲁϫⲣⲟ ⲙ̀ⲫ̀ⲓⲟⲙ ϧⲉⲛ ⲧⲉⲕϫⲟⲙ ⲛ̀ⲑⲟⲕ ⲁⲕϧⲟⲙϧⲉⲙ: ⲛ̀ⲛⲓⲁ̀ⲫⲏⲟⲩⲓ̀ ⲛ̀ⲧⲉ ⲛⲓⲇ̀ⲣⲁⲕⲱⲛ ϩⲓϫⲉⲛ ⲛⲓⲙⲱⲟ̀ⲩ: ⲛ̀ⲑⲟⲕ ⲁⲕⲗⲉⲥ ⲛⲓⲁ̀ⲫⲏⲟⲩⲓ̀ ⲛ̀ⲧⲉ ⲡⲓⲇ̀ⲣⲁⲕⲱⲛ: ⲟⲩⲟϩ ⲁⲕⲧⲏⲓϥ ⲛ̀ϧ̀ⲣⲉ ⲙ̀ⲡⲓⲗⲁⲟⲥ ⲛ̀ⲧⲉ ⲛⲓⲉ̀ⲑⲁⲩϣ. Ⲁⲗⲗⲏⲗⲟⲩⲓⲁ.

Ⲛ̀ⲑⲟⲕ ⲁⲕⲫⲱϫⲓ ⲛ̀ⲛⲓⲙⲟⲩⲙⲓ ⲛⲉⲙ ⲛⲓⲙⲟⲩⲛⲥⲱⲣⲉⲙ: ⲫⲱⲕ ⲡⲉ ⲡⲓⲉ̀ϩⲟⲟ̀ⲩ ⲫⲱⲕ ⲟⲛ ⲡⲉ ⲡⲓⲉ̀ϫⲱⲣϩ. Ⲁⲗⲗⲏⲗⲟⲩⲓⲁ.

Ⲫϯ ⲁⲩⲛⲁⲩ ⲉ̀ⲣⲟⲕ ⲛ̀ϫⲉ ϩⲁⲛⲙⲱⲟ̀ⲩ ⲁⲩⲛⲁⲩ ⲉ̀ⲣⲟⲕ ⲛ̀ϫⲉ ϩⲁⲛⲙⲱⲟ̀ⲩ ⲟⲩⲟϩ ⲁⲩⲉ̀ⲣϩⲟϯ: ⲁⲩϣ̀ⲑⲟⲣⲧⲉⲣ ⲛ̀ϫⲉ ⲛⲓⲛⲟⲩⲛ ⲛ̀ⲧⲉⲛ ⲡ̀ⲁ̀ϣⲁⲓ ⲛ̀ⲧ̀ⲥ̀ⲙⲏ ⲛ̀ⲧⲉ ϩⲁⲛⲙⲱⲟ̀ⲩ: ⲛⲓϭⲏⲡⲓ ⲁⲩϯ ⲛ̀ⲧⲟⲩⲥ̀ⲙⲏ: ⲕⲉ ⲅⲁⲣ ⲛⲉⲕⲥⲟⲑⲛⲉϥ ⲥⲉⲙⲟϣⲓ: ⲧ̀ⲥ̀ⲙⲏ ⲛ̀ⲧⲉ ⲛⲉⲕϧⲁⲣⲁⲃⲁⲓ ϧⲉⲛ ⲡⲓⲧ̀ⲣⲟⲭⲟⲥ. Ⲁⲗⲗⲏⲗⲟⲩⲓⲁ.

Ⲛⲉⲕⲥⲉⲧⲉⲃⲣⲏϫ ⲁⲩⲉⲣⲟⲩⲱ̀ⲓⲛⲓ ⲉ̀ϯⲟⲓⲕⲟⲩⲙⲉⲛⲏ: ⲁϥⲕⲓⲙ ⲟⲩⲟϩ ⲁϥⲥ̀ⲑⲉⲣⲧⲉⲣ ⲛ̀ϫⲉ ⲡ̀ⲕⲁϩⲓ. Ⲁⲗⲗⲏⲗⲟⲩⲓⲁ.

Ⲫϯ ⲉ̀ⲣⲉ ⲡⲉⲕⲙⲱⲓⲧ ⲛ̀ϧ̀ⲣⲏⲓ ϧⲉⲛ ⲫ̀ⲓⲟⲙ: ⲟⲩⲟϩ ⲛⲉⲕⲙⲁ ⲙ̀ⲙⲟϣⲓ ϧⲉⲛ ϩⲁⲛⲙⲱⲟ̀ⲩ ⲉⲩⲟϣ. Ⲁⲗⲗⲏⲗⲟⲩⲓⲁ.

Ⲛ̀ⲑⲟⲕ ⲉⲧⲟⲓ ⲛ̀ⲛⲏⲃ ⲉ̀ⲡ̀ⲁ̀ⲙⲁϩⲓ ⲛ̀ⲧⲉ ⲫ̀ⲓⲟⲙ: ⲟⲩⲟϩ ⲡ̀ⲕⲓⲙ ⲛ̀ⲧⲉ ⲛⲉϥϫⲟⲗ ⲛ̀ⲑⲟⲕ ϣⲁⲕⲑ̀ⲣⲉϥϩ̀ⲣⲟⲩⲣ. Ⲁⲗⲗⲏⲗⲟⲩⲓⲁ.

Ⲉⲓⲉ̀ⲭⲱ ⲛ̀ⲧⲉϥϫⲓϫ ϧⲉⲛ ⲫ̀ⲓⲟⲙ: ⲟⲩⲟϩ ⲧⲉϥⲟ̀ⲩⲓ̀ⲛⲁⲙ ϧⲉⲛ ϩⲁⲛⲓⲁⲣⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲁⲩⲧⲱⲟ̀ⲩⲛⲟⲩ ⲛ̀ϫⲉ ϩⲁⲛⲓⲁⲣⲱⲟ̀ⲩ: Ⲡⲟ̅ⲥ̅ ⲁⲩϭⲓⲥⲓ ⲛ̀ⲧⲟⲩⲥ̀ⲙⲏ ⲛ̀ϫⲉ ϩⲁⲛⲓⲁⲣⲱⲟ̀ⲩ ⲉ̀ⲃⲟⲗ ϩⲁ ⲧ̀ⲥ̀ⲙⲏ ⲛ̀ⲧⲉ ϩⲁⲛⲙⲱⲟ̀ⲩ ⲉⲩⲟϣ. Ⲁⲗⲗⲏⲗⲟⲩⲓⲁ.

Ϩⲁⲛϣ̀ⲫⲏⲣⲓ ⲛⲉ ⲛⲓⲣⲱⲟ̀ⲩϣ ⲛ̀ⲧⲉ ⲫ̀ⲓⲟⲙ: ϥ̀ⲟⲓ ϣ̀ⲫⲏⲣⲓ ⲛ̀ϫⲉ Ⲡⲟ̅ⲥ̅ ϧⲉⲛ ⲛⲏⲉ̀ⲧϭⲟⲥⲓ. Ⲁⲗⲗⲏⲗⲟⲩⲓⲁ.

Ⲙⲁⲣⲟⲩⲟ̀ⲩⲛⲟϥ ⲛ̀ϫⲉ ⲛⲓⲫⲏⲟⲩⲓ̀: ⲟⲩⲟϩ ⲙⲁⲣⲉϥⲑⲉⲗⲏⲗ ⲛ̀ϫⲉ ⲡ̀ⲕⲁϩⲓ: ⲙⲁⲣⲉϥⲕⲓⲙ ⲛ̀ϫⲉ ⲫ̀ⲓⲟⲙ ⲛⲉⲙ ⲡⲉϥⲙⲟϩ ⲧⲏⲣϥ: Ⲉⲩⲉ̀ⲣⲁϣⲓ ⲛ̀ϫⲉ ⲛⲓⲙⲉϣϣⲟϯ ⲛⲉⲙ ϩⲱⲃ ⲛⲓⲃⲉⲛ ⲉ̀ⲧⲉ ⲛ̀ϧⲏⲧⲟⲩ. Ⲁⲗⲗⲏⲗⲟⲩⲓⲁ.

Ⲧⲟⲧⲉ ⲉⲩⲉ̀ⲑⲉⲗⲏⲗ ⲛ̀ϫⲉ ⲛⲓϣ̀ϣⲏⲛ ⲧⲏⲣⲟⲩ ⲛ̀ⲧⲉ ⲡⲓⲓⲁϩϣ̀ϣⲏⲛ: ⲉ̀ⲃⲟⲗ ϧⲁⲧ̀ϩⲏ ⲙ̀ⲡ̀ϩⲟ ⲙ̀Ⲡⲟ̅ⲥ̅ ϫⲉ ϥ̀ⲛⲏⲟⲩ ϫⲉ ϥ̀ⲛⲏⲟⲩ ⲉ̀ϯϩⲁⲡ ⲉ̀ⲡ̀ⲕⲁϩⲓ. Ⲁⲗⲗⲏⲗⲟⲩⲓⲁ.

Ⲙⲁⲣⲉϥⲕⲓⲙ ⲛ̀ϫⲉ ⲫ̀ⲓⲟⲙ ⲛⲉⲙ ⲛⲉϥⲙⲟϩ ⲧⲏⲣϥ: ϩⲁⲛⲓⲁⲣⲱⲟ̀ⲩ ⲉⲩⲉ̀ⲕⲱⲗϩ ⲛ̀ⲛⲟⲩϫⲓ ⲉⲩⲥⲟⲡ: ⲟⲩⲟϩ ⲛⲓⲧⲱⲟ̀ⲩ ⲉⲩⲉ̀ⲑⲉⲗⲏⲗ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ϫⲉ ⲁϥⲓ̀ ⲉ̀ϯϩⲁⲡ ⲉ̀ⲡ̀ⲕⲁϩⲓ. Ⲁⲗⲗⲏⲗⲟⲩⲓⲁ.

Ⲫ̀ⲛⲟⲩⲛ ⲙ̀ⲫ̀ⲣⲏϯ ⲛ̀ⲟⲩ̀ϩ̀ⲃⲱⲥ ⲛ̀ϫⲱⲗϩ ⲛ̀ⲧⲁϥ ϩⲁⲛⲙⲱⲟ̀ⲩ ⲉⲩⲉⲟ̀ϩⲓ ⲉ̀ⲣⲁⲧⲟⲩ ⲉ̀ϫⲉⲛ ⲛⲓⲧⲱⲟ̀ⲩ ⲉ̀ⲃⲟⲗϧⲉⲛ ⲧⲉⲕⲉ̀ⲡⲓⲧⲓⲙⲓⲁ ⲥⲉⲛⲁⲫⲱⲧ: ⲛ̀ⲧⲉⲛⲧ̀ⲥ̀ⲙⲏ ⲛ̀ⲧⲉ ⲛⲉⲕϧⲁⲣⲁⲃⲁⲓ ⲉⲩⲉⲉ̀ⲣϩⲟϯ: ϩⲁⲛⲧⲱⲟ̀ⲩ ⲉⲩⲛⲁ ⲉ̀ⲡ̀ⲱϣⲓ: ⲟⲩⲟϩ ϩⲁⲛⲙⲉϣϣⲟϯ ⲉⲩⲛⲏⲟⲩ ⲉ̀ⲡⲉⲥⲏⲧ ⲉ̀ⲡⲓⲙⲁ ⲉ̀ⲧⲁⲕϩⲓⲥⲉⲛϯ ⲙ̀ⲙⲟϥ ⲛⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲫⲏ ⲉⲑⲟⲩⲱ̀ⲣⲡ ⲛ̀ϩⲁⲛⲙⲟⲩⲙⲓ ⲉ̀ⲃⲟⲗϧⲉⲛ ϩⲁⲛϧⲉⲗⲗⲟⲧ: ⲉⲩⲉ̀ⲥⲓⲛⲓ ϧⲉⲛ ⲑ̀ⲙⲏϯ ⲛ̀ϩⲁⲛⲧⲱⲟ̀ⲩ ⲛ̀ϫⲉ ϩⲁⲛⲙⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲫ̀ⲓⲟⲙ ⲁϥⲛⲁⲩ ⲟⲩⲟϩ ⲁϥⲫⲱⲧ: ⲟⲩⲟϩ ⲡⲓⲒⲟⲣⲇⲁⲛⲏⲥ ⲁϥⲕⲟⲧϥ ⲉ̀ⲫⲁϩⲟⲩ ⲛⲓⲧⲱⲟ̀ⲩ ⲉⲩⲉ̀ⲑⲉⲗⲏⲗ ⲙ̀ⲫ̀ⲣⲏϯ ⲛ̀ϩⲁⲛⲱ̀ⲓⲗⲓ: ⲟⲩⲟϩ ⲛⲓⲕⲁⲗⲁⲙⲫⲟ ⲙ̀ⲫ̀ⲣⲏϯ ⲛ̀ϩⲁⲛϩⲓⲏⲃ ⲛ̀ⲉⲥⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲟⲩⲡⲉⲧϣⲟⲡ ⲫ̀ⲓⲟⲙ ϫⲉ ⲁⲕⲫⲱⲧ ⲟⲩⲟϩ ⲛ̀ⲑⲟⲕ ⲡⲓⲒⲟⲣⲇⲁⲛⲏⲥ ϫⲉ ⲁⲕⲕⲟⲧⲕ ⲉ̀ⲫⲁϩⲟⲩ ⲛⲓⲧⲱⲟ̀ⲩ ϫⲉ ⲁ̀ⲧⲉⲧⲉⲛⲑⲉⲗⲏⲗ ⲙ̀ⲫ̀ⲣⲏϯ ⲛ̀ϩⲁⲛⲱ̀ⲓⲗⲓ ⲛⲉⲙ ⲛⲓⲕⲁⲗⲁⲙⲫⲟ ⲙ̀ⲫ̀ⲣⲏϯ ⲛ̀ϩⲁⲛϩⲓⲏⲃ ̀ⲛ̀ⲉ̀ⲥⲱⲟ̀ⲩ. Ⲁⲗⲗⲏⲗⲟⲩⲓⲁ.

Ⲡ̀ⲕⲁϩⲓ ⲁϥⲕⲓⲙ ⲉ̀ⲃⲟⲗ ϧⲁⲧ̀ϩⲏ ⲙ̀ⲡ̀ϩⲟ ⲙ̀Ⲡⲟ̅ⲥ̅ ⲛⲉⲙ ⲉ̀ⲃⲟⲗ ϧⲁⲧ̀ϩ̀ⲏ ⲙ̀ⲡ̀ϩⲟ ⲙ̀Ⲫϯ ⲛ̀Ⲓⲁⲕⲱⲃ. Ⲁⲗⲗⲏⲗⲟⲩⲓⲁ.

Ⲙⲁⲣⲟⲩ ϭⲁⲥϥ ϧⲉⲛ ⲧ̀ⲉⲕⲕ̀ⲗⲏⲥⲓⲁ ⲛ̀ⲧⲉ ⲡⲉϥⲗⲁⲟⲥ: ⲟⲩⲟϩ ⲙⲁⲣⲟⲩ ⲥ̀ⲙⲟⲩ ⲉ̀ⲣⲟϥ ϩⲓⲧ̀ⲕⲁⲑⲉⲇⲣⲁ ⲛ̀ⲧⲉ ⲛⲓⲡ̀ⲣⲉⲥⲃⲩⲧⲉⲣⲟⲥ: ϫⲉ ⲁϥⲭⲱ ⲛ̀ⲟⲩⲙⲉⲧⲓⲱⲧ ⲙ̀ⲫ̀ⲣⲏϯ ⲛ̀ϩⲁⲛ ⲉ̀ⲥⲱⲟ̀ⲩ ⲉⲩⲉ̀ⲛⲁⲩ ⲛ̀ϫⲉ ⲛⲏⲉ̀ⲧⲥⲟⲩⲱ̀ⲛ ⲟⲩⲟϩ ⲉⲩⲉ̀ⲟ̀ⲩⲛⲟϥ. Ⲁⲗⲗⲏⲗⲟⲩⲓⲁ.

Ⲁϥⲱⲣⲕ ⲛ̀ϫⲉ Ⲡⲟ̅ⲥ̅ ⲟⲩⲟϩ ⲛ̀ⲛⲉϥⲟ̀ⲩⲱⲙ ⲛ̀ϩ̀ⲑⲏϥ: ϫⲉ ⲛ̀ⲑⲟⲕ ⲡⲉ ⲫ̀ⲟⲩⲏⲃ ϣⲁ ⲉ̀ⲛⲉϩ: ⲕⲁⲧⲁ ⲧ̀ⲧⲁⲝⲓⲥ ⲙ̀Ⲙⲉⲗⲭⲓⲥⲉⲇⲉⲕ. Ⲁⲗⲗⲏⲗⲟⲩⲓⲁ.

Ⲫϯ ⲉϥⲉ̀ϣⲉⲛϩⲏⲧ ϧⲁⲣⲟⲛ: ⲉϥⲉ̀ⲥ̀ⲙⲟⲩ ⲉ̀ⲣⲟⲛ: ⲉϥⲉ̀ⲟⲩⲱⲛϩ ⲙ̀ⲡⲉϥϩⲟ ⲉ̀ϩ̀ⲣⲏⲓ ⲉ̀ϫⲱⲛ: ⲟⲩⲟϩ ⲉϥⲉ̀ⲛⲁⲓ ⲛⲁⲛ. Ⲁⲗⲗⲏⲗⲟⲩⲓⲁ.

Ⲡⲟ̅ⲥ̅ ⲛⲟϩⲉⲙ ⲙ̀ⲡⲉⲕⲗⲁⲟⲥ ⲥ̀ⲙⲟⲩ ⲉ̀ⲧⲉⲕⲕ̀ⲗⲏⲣⲟⲛⲟⲙⲓⲁ: ⲁ̀ⲙⲟⲛⲓ ⲙ̀ⲙⲱⲟ̀ⲩ ϭⲁⲥⲟⲩ ϣⲁ ⲉ̀ⲛⲉϩ. Ⲁⲗⲗⲏⲗⲟⲩⲓⲁ.

Ⲛⲓⲙ ⲡⲉ ⲡⲓⲥⲁⲃⲉ ⲟⲩⲟϩ ⲛ̀ⲧⲉϥⲁ̀ⲣⲉϩ ⲉ̀ⲛⲁⲓ ⲟⲩⲟϩ ⲛ̀ⲥⲉⲕⲁϯ ⲉ̀ⲛⲓ ⲛⲁⲓ ⲛ̀ⲧⲉ Ⲡⲟ̅ⲥ̅. Ⲁⲗⲗⲏⲗⲟⲩⲓⲁ.

Ⲥⲙⲟⲩ ⲉ̀ⲣⲟⲓ: ⲓⲥ ϯⲙⲉⲧⲁ̀ⲛⲟⲓⲁ̀ ⲭⲱ ⲛⲏⲓ ⲉ̀ⲃⲟⲗ: ⲛⲁⲓⲟϯ ⲛⲉⲙ ⲛⲁⲥ̀ⲛⲏⲟⲩ ϣ̀ⲗⲏⲗ ⲉ̀ϩ̀ⲣⲏⲓ ⲉ̀ϫⲱⲓ: ϧⲉⲛ ⲟⲩⲁⲅⲁⲡⲏ ϯϯϩⲟ ⲉ̀ⲣⲱⲧⲉⲛ ⲁ̀ⲣⲓⲡⲁⲙⲉⲩⲓ̀.

Ⲇⲟⲝⲁ Ⲡⲁⲧⲣⲓ ⲕⲉ Ⲩⲓⲱ̀ ⲕⲉ Ⲁⲅⲓⲱ̀ Ⲡ̀ⲛⲉⲩⲙⲁⲧⲓ. Ⲕⲉ ⲛⲩⲛ ⲕⲉ ⲁ̀ⲓ̀ ⲕⲉ ⲓⲥⲧⲟⲩⲥ ⲉ̀ⲱ̀ⲛⲁⲥ ⲧⲱⲛ ⲉ̀ⲱ̀ⲛⲱⲛ ⲁ̀ⲙⲏⲛ. Ⲁⲗ̅ Ⲕⲩⲣⲓⲉ̀ ⲉ̀ⲗⲉⲏ̀ⲥⲟⲛ Ⲕⲩⲣⲓⲉ̀ ⲉ̀ⲗⲉⲏ̀ⲥⲟⲛ Ⲕⲩⲣⲓⲉ̀ ⲉ̀ⲗⲉⲏ̀ⲥⲟⲛ.