Psali Watos - Friday :: Ⲁⲓⲛⲁⲉ̀ⲣϩⲏⲧⲥ ⲱ̀ ⲛⲁⲙⲉⲛⲣⲁϯ ⲛⲓⲡⲓⲥⲧⲟⲥ :: إبصاليه واطس - يوم الجمعة

Ⲁⲓⲛⲁⲉ̀ⲣϩⲏⲧⲥ ⲱ̀ ⲛⲁⲙⲉⲛⲣⲁϯ ⲛⲓⲡⲓⲥⲧⲟⲥ: ⲛ̀ⲧⲉⲛϩⲱⲥ ⲉ̀Ⲡⲟ̅ⲥ̅ ϧⲉⲛ ⲟⲩϩⲱⲥ ⲙ̀ⲃⲉⲣⲓ: ⲉⲑⲃⲉ ⲡ̀ϫⲓⲛⲙⲓⲥⲓ ⲛ̀Ⲓⲏ̅ⲥ̅ Ⲡⲭ̅ⲥ̅: ⲡ̀Ϣⲏⲣⲓ ⲙ̀Ⲫϯ ⲫⲏⲈ̀ⲧϭⲟⲥⲓ.
Ⲃⲟⲛ ⲛⲓⲃⲉⲛ ⲁⲩⲣⲁϣⲓ ⲙ̀ⲫⲟⲟ̀ⲩ: ⲛⲉⲙ ⲡ̀ⲭⲟⲣⲟⲥ ⲛ̀ⲛⲓⲁ̀ⲅⲅⲉⲗⲟⲥ: ϫⲉ Ⲡⲭ̅ⲥ̅ ⲡ̀Ⲟⲩⲣⲟ ⲛ̀ⲧⲉ ⲡ̀ⲱ̀ⲟ̀ⲩ: ⲁⲩⲙⲁⲥϥ ⲉ̀ⲃⲟⲗϧⲉⲛ ϯⲠⲁⲣⲑⲉⲛⲟⲥ.

+ Ⲅⲉⲛⲟⲥ ⲛ̀ⲛⲓⲭ̀ⲣⲓⲥⲧⲓⲁ̀ⲛⲟⲥ: ⲛⲁⲩⲑⲱⲟⲩϯ ⲙ̀ⲫⲟⲟ̀ⲩ ϧⲉⲛ ϩⲁⲛⲯ̀ⲁⲗⲓⲁ: ⲉⲑⲃⲉ ⲡⲓϫ̀ⲫⲟ ⲛ̀Ⲓⲏ̅ⲥ̅ Ⲡⲭ̅ⲥ̅: ⲉ̀ⲃⲟⲗϧⲉⲛ ⲧⲉⲛⲟ̅ⲥ̅ Ⲙⲁⲣⲓⲁ.
+ Ⲇⲁⲩⲓⲇ ⲡ̀ⲟⲩⲣⲟ ⲙ̀ⲡⲒⲥⲣⲁⲏ̀ⲗ: ⲁϥⲧⲁⲙⲟⲛ ϧⲉⲛ ⲟⲩⲡⲁⲣⲣⲏⲥⲓⲁ: ⲉⲑⲃⲉ ⲡⲓϫ̀ⲫⲟ ⲛ̀Ⲉⲙⲙⲁⲛⲟⲩⲏⲗ: ⲡⲓⲖⲟⲅⲟⲥ ⲙ̀Ⲫϯ ⲡⲓⲀⲓⲇⲓⲁ.

Ⲉⲑⲃⲉ ⲡ̀ϫⲓⲛⲙⲓⲥⲓ ⲙ̀ⲡⲉⲛⲤⲱⲧⲏⲣ: ⲁⲩϣⲱⲡⲓ ⲛ̀ⲟ̀ⲩⲛⲟϥ ⲙ̀ⲙⲱⲟ̀ⲩ: ⲁⲩⲛⲁⲩ ⲉ̀ⲡⲉϥⲕⲁⲣⲁⲕⲧⲏⲣ ⲛ̀ⲧⲉϥⲙⲉⲑⲛⲟⲩϯ ⲛⲉⲙ ⲡⲉϥⲱ̀ⲟ̀ⲩ.
Ⲍⲉⲟ̀ϣ ⲛ̀ϫⲉ ⲛⲉⲕⲙⲉⲧϣⲉⲛϩⲏⲧ: ⲛⲏⲉ̀ⲧⲁϥⲓ̀ⲣⲓ ϧⲉⲛ ⲡⲓⲕⲟⲥⲙⲟⲥ: ϫⲉ ⲛ̀ⲑⲟϥ ⲟⲩⲛⲟⲩϯ ⲛ̀ⲛⲁⲏ̀ⲧ: ⲁϥϣⲁⲓ ⲉ̀ⲃⲟⲗϧⲉⲛ ϯⲠⲁⲣⲑⲉⲛⲟⲥ.

+ Ⲏⲡⲡⲉ ⲅⲁⲣ ⲡⲓⲁ̀ⲅⲅⲉⲗⲟⲥ: ⲁϥⲥⲁϫⲓ ⲛⲉⲙ ⲛⲓⲙⲁⲛⲉ̀ⲥⲱⲟⲩ: ⲙ̀ⲡⲁⲓⲣⲏϯ ⲉϥϫⲱ ⲙ̀ⲙⲟⲥ: ⲡⲓⲣⲉϥⲑⲁⲙⲓⲟ ⲁⲩⲙⲓⲥⲓ ⲙ̀ⲫⲟⲟ̀ⲩ.
+ Ⲑⲱⲕ ⲧⲉ ϯϫⲟⲙ ⲛⲉⲙ ⲡⲓⲧⲁⲓⲟ: ⲱ̀ ⲡⲉⲛⲤⲱⲧⲏⲣ ⲫⲁ ϯⲉ̀ⲝⲟⲩⲥⲓⲁ: ⲱ̀ ⲫⲏⲉ̀ⲧⲁⲩⲙⲁⲥϥ ϩⲱⲥ ⲟⲩⲣⲟ: ϧⲉⲛ Ⲃⲏⲑⲗⲉⲉⲙ ⲛ̀ⲧⲉ ϯⲒⲟⲩⲇⲉⲁ̀.

Ⲓⲥ ⲛⲓⲟ̀ⲩⲣⲱⲟⲩ ⲛ̀ϩⲁⲛⲙⲁⲅⲟⲥ: ⲁⲩⲓ̀ⲛⲓ ⲛⲁϥ ⲛ̀ϩⲁⲛⲇⲱⲣⲟⲛ: ⲟⲩⲛⲟⲩⲃ ⲛⲉⲙ ⲟⲩⲗⲓⲃⲁⲛⲟⲥ: ⲛⲉⲙ ⲟⲩϣⲁⲗ ϩⲱⲥ ⲡ̀Ⲟⲩⲣⲟ ⲛ̀ⲛⲓⲉ̀ⲱⲛ.
Ⲕⲩⲣⲓⲟⲥ Ⲓⲏ̅ⲥ̅ Ⲡⲭ̅ⲥ̅: ⲁϥϣⲁⲓ ⲉ̀ⲃⲟⲗ ϧⲉⲛ ϯⲠⲁⲣⲑⲉⲛⲟⲥ: ϧⲉⲛ Ⲃⲏⲑⲗⲉⲉⲙ ϩⲱⲥ ⲁ̀ⲅⲁⲑⲟⲥ: ϣⲁ ⲛ̀ⲧⲉϥⲥⲱϯ ⲙ̀ⲡⲉⲛⲅⲉⲛⲟⲥ.

+ Ⲗⲟⲓⲡⲟⲛ Ⲓⲉⲣⲉⲙⲓⲁⲥ ⲁϥⲥⲁϫⲓ: ϩⲏⲡⲡⲉ ⲓⲥ ⲁϥⲟ̀ⲩⲟ̀ⲛϩϥ ϩⲓϫⲉⲛ ⲡⲓⲕⲁϩⲓ: ⲁϥⲉⲣϣ̀ⲫⲏⲣⲓ ⲛⲉⲙ ⲛⲓⲣⲱⲙⲓ: ⲡ̀Ϣⲏⲣⲓ ⲙ̀ⲫⲏⲈ̀ⲧϭⲟⲥⲓ.
+ Ⲙⲱⲩ̀ⲥⲏⲥ ⲡⲓⲁ̀ⲣⲭⲏ ⲡ̀ⲣⲟⲫⲏⲧⲏⲥ: ⲁϥⲛⲁⲩ ⲙ̀ⲡ̀ⲧⲩⲡⲟⲥ ⲙ̀ⲡⲓⲃⲁⲧⲟⲥ: ⲟⲩⲟϩ ⲡⲓⲭ̀ⲣⲱⲙ ⲙⲟϩ ⲛ̀ϧⲏⲧϥ: ϯⲙⲉⲑⲛⲟⲩϯ ⲛ̀Ⲓⲏ̅ⲥ̅ Ⲡⲭ̅ⲥ̅.

Ⲛⲓⲟ̀ⲩⲣⲱⲟⲩ ϣⲟⲙⲧ (ⲅ̅) ⲛ̀ϩⲁⲛⲙⲁⲅⲟⲥ: ⲛ̀ⲑⲱⲟ̀ⲩ ⲁⲩⲉⲣⲙⲉⲑⲣⲉ ⲛ̀ⲕⲁⲗⲱⲥ: ⲙ̀ⲡⲁⲓⲣⲏϯ ⲉⲩϫⲱ ⲙ̀ⲙⲟⲥ: ⲁ̀ⲗⲏⲑⲱⲥ ⲁ̀ⲛⲛⲁⲩ ⲉ̀Ⲡⲭ̅ⲥ̅.
Ⲝ̀ⲙⲁⲣⲱⲟⲩⲧ ϣⲁ ϯⲥⲩⲛⲧⲉⲗⲓⲁ: ⲱ̀ ⲫⲏⲉ̀ⲧⲁⲩⲙⲁⲥϥ ⲛ̀ϫⲉ ϯⲠⲁⲣⲑⲉⲛⲟⲥ: ϧⲉⲛ Ⲃⲏⲑⲗⲉⲉⲙ ⲛ̀ⲧⲉ ϯⲒⲟⲩⲇⲉⲁ̀: ⲧⲉⲛϯϩⲟ ⲛⲁⲓ ⲛⲁⲛ ⲱ̀ ⲡⲓⲁ̀ⲅⲁⲑⲟⲥ.

+ Ⲟⲩⲱ̀ⲟ̀ⲩ ⲙ̀Ⲫϯ ϧⲉⲛ ⲛⲏⲉ̀ⲧϭⲟⲥⲓ: ⲛⲉⲙ ⲟⲩϩⲓⲣⲏⲛⲏ ϩⲓϫⲉⲛ ⲡⲓⲕⲁϩⲓ: ⲛⲉⲙ ⲟⲩϯⲙⲁϯ ϧⲉⲛ ⲛⲓⲣⲱⲙⲓ: ϫⲉ ⲁϥϣⲁⲓ ⲛⲁⲛ ⲛ̀ϫⲉ ⲡⲓⲟ̀ⲩⲱ̀ⲓⲛⲓ.
+ ⲠⲓⲞ̀ⲩⲁⲓ ⲉ̀ⲃⲟⲗϧⲉⲛ ϯⲦ̀ⲣⲓⲁⲥ: ⲁϥϣⲁⲓ ⲛⲁⲛ ⲉ̀ⲃⲟⲗϧⲉⲛ ϯⲠⲁⲣⲑⲉⲛⲟⲥ: Ⲓⲏ̅ⲥ̅ Ⲡⲭ̅ⲥ̅ Ⲙⲁⲥⲓⲁⲥ: ⲁⲥⲙⲓⲥⲓ ⲙ̀ⲙⲟϥ ϩⲱⲥ ⲁ̀ⲅⲁⲑⲟⲥ.

Ⲣⲁϣⲓ ⲱ̀ ϯⲡⲟⲗⲓⲥ ⲙ̀Ⲡ̀ⲟ̅ⲥ̅: Ⲃⲏⲑⲗⲉⲉⲙ ⲑ̀ⲃⲁⲕⲓ ⲛ̀Ⲇⲁⲩⲓⲇ: ϫⲉ ⲁϥϣⲁⲓ ⲛ̀ϧⲏϯ Ⲡⲭ̅ⲥ̅: ⲡⲓⲙⲟⲛⲟⲅⲉⲛⲏⲥ ⲙ̀ⲙⲉⲛⲣⲓⲧ.
Ⲥⲱⲧⲉⲙ ⲉ̀ⲣⲟⲛ ⲱ̀ ⲡⲉⲛⲚⲏⲃ Ⲡⲭ̅ⲥ̅: ⲛⲁϩⲙⲉⲛ ⲉ̀ⲃⲟⲗϧⲉⲛ ⲛⲉⲛⲑ̀ⲗⲓⲯⲓⲥ: ⲟⲩⲟϩ ⲛⲁⲓ ⲛⲁⲛ ⲱ̀ ⲡⲓⲁ̀ⲅⲁⲑⲟⲥ: ϧⲉⲛ ⲡⲓⲉ̀ϩⲟⲟⲩ ⲛ̀ⲧⲉ ϯⲕ̀ⲣⲏⲥⲓⲥ.

+ Ⲧⲉⲛϩⲱⲥ ⲉ̀ⲣⲟⲕ ⲛⲉⲙ ⲛⲓⲬⲉⲣⲟⲩⲃⲓⲙ: ϫⲉ ⲭ̀ⲟⲩⲁⲃ ⲭ̀ⲟⲩⲁⲃ ⲟⲩⲟϩ ⲭ̀ⲟⲩⲁⲃ: ⲧⲉⲛⲥ̀ⲙⲟⲩ ⲉ̀ⲣⲟⲕ ⲛⲉⲙ ⲛⲓⲤⲉⲣⲁⲫⲓⲙ: ⲛ̀ⲑⲟⲕ ⲡ̀Ϣⲏⲣⲓ ⲙ̀ⲫⲏⲈ̀ⲑⲟⲩⲁⲃ.
+ Ⲩⲓⲟⲥ Ⲑⲉⲟⲥ ⲁ̀ⲣⲉϩ ⲉ̀ⲣⲟⲛ: ⲉ̀ⲃⲟⲗϩⲁ ⲡⲓⲫⲁϣ ⲛ̀ⲧⲉ ⲛⲓⲇⲉⲙⲟⲛ: ⲱ̀ⲗⲓ ⲙ̀ⲡⲉⲕϫⲱⲛⲧ ⲉ̀ⲃⲟⲗϩⲁⲣⲟⲛ: ⲱ̀ ⲡⲓⲞⲩⲣⲟ ⲛ̀ⲧⲉ ⲛⲓⲉ̀ⲱ̀ⲛ.

Ⲫⲏⲉ̀ⲧⲱ̀ⲗⲓ ⲙ̀ⲫ̀ⲛⲟⲃⲓ ⲛ̀ⲧⲉ ⲡⲓⲕⲟⲥⲙⲟⲥ: ⲱ̀ Ⲡⲭ̅ⲥ̅ ⲡⲓϨⲏⲓⲃ ⲛ̀ⲧⲉ Ⲫϯ: ϭⲓⲥⲓ ⲙ̀ⲡ̀ⲧⲁⲡ ⲛ̀ⲛⲓⲭ̀ⲣⲓⲥⲧⲓⲁⲛⲟⲥ: ⲟⲩⲟϩ ⲛⲁϩⲙⲟⲩ ⲉ̀ⲃⲟⲗ ϩⲁ ⲟⲩϩⲟϯ.
Ⲭⲉⲣⲉ ϯⲡⲟⲗⲓⲥ Ⲓⲉⲣⲟⲩⲥⲁⲗⲏⲙ: ⲛⲉⲙ Ⲥⲓⲱⲛ ⲛⲉⲙ Ⲃⲏⲑⲗⲉⲉⲙ: ⲭⲉⲣⲉ ⲧ̀ϣⲉⲣⲓ ⲛ̀Ⲓⲱⲁⲕⲓⲙ: ϯⲠⲁⲣⲑⲉⲛⲟⲥ Ⲙⲁⲣⲓⲁⲙ.

+ Ⲯⲩⲭⲏ ⲛⲓⲃⲉⲛ ⲛ̀Ⲟⲣⲑⲟⲇⲟⲝⲟⲥ: ⲙⲁⲙ̀ⲧⲟⲛ ⲛⲱⲟⲩ ⲉⲑⲃⲉ ϯⲠⲁⲣⲑⲉⲛⲟⲥ: Ⲙⲁⲣⲓⲁ ϯϭⲣⲟⲙⲡⲓ ⲉⲑⲛⲉⲥⲱⲥ: ⲑ̀ⲙⲁⲩ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅.
+ Ⲱ̀ ⲫⲏⲉ̀ⲧⲁⲩⲙⲁⲥϥ ⲛ̀ϫⲉ ϯⲠⲁⲣⲑⲉⲛⲟⲥ: ϧⲉⲛ Ⲃⲏⲑⲗⲉⲉⲙ ⲛ̀ⲧⲉ ϯⲒⲟⲩⲇⲉⲁ̀: ⲭⲱ ⲛⲁⲛ ⲉ̀ⲃⲟⲗ ⲁ̀ⲛⲟⲛ ⲡⲉ ⲡⲉⲕⲗⲁⲟⲥ: ⲟⲩⲟϩ ⲙⲁⲧⲁϫⲣⲟⲛ ϣⲁ ϯⲥⲩⲛⲧⲉⲗⲓⲁ.