Psali Watos - Friday :: Ⲁϥⲓ̀ ⲛ̀ϫⲉ ⲡⲓⲡ̀ⲣⲟⲇⲣⲟⲙⲟⲥ :: إبصاليه واطس - الجمعة

Ⲁϥⲓ̀ ⲛ̀ϫⲉ ⲡⲓⲡ̀ⲣⲟⲇⲣⲟⲙⲟⲥ: ⲡⲓⲥⲩⲅⲅⲉⲛⲏⲥ ⲛ̀Ⲉⲙⲙⲁⲛⲟⲩⲏⲗ: Ⲓⲱⲁⲛⲛⲏⲥ ⲡⲓⲣⲉϥϯⲱⲙⲥ: ⲉ̀ⲡ̀ⲕⲁϩⲓ ⲛ̀ⲧⲉ ⲡⲒⲥⲣⲁⲏ̀ⲗ.
Ⲃⲁⲡⲧⲓⲥⲓⲛ ϧⲉⲛ ⲫ̀ⲓⲁⲣⲟ: ⲙ̀ⲡⲓⲙⲱⲟ̀ⲩ ⲛ̀ⲧⲉ ⲡⲓⲒⲟⲣⲇⲁⲛⲏⲥ: ϫⲉ ⲁⲥϧⲱⲛⲧ ⲛ̀ϫⲉ ϯⲙⲉⲧⲟⲩⲣⲟ: ⲛ̀ⲧⲉ ⲛⲓⲫⲏⲟⲩⲓ̀ ϧⲉⲛ ⲟⲩⲓⲏⲥ.

Ⲅⲉⲛⲟⲥ ⲛⲓⲃⲉⲛ ⲡ̀ⲏⲓ ⲛ̀Ⲓⲟⲩⲇⲁ: ⲁ̀ⲣⲓⲟ̀ⲩⲓ̀ ⲛ̀ⲟⲩⲟ̀ⲩⲧⲁϩ: ϥ̀ⲉ̀ⲙⲡ̀ϣⲁ ⲛ̀ϯⲙⲉⲧⲁⲛⲟⲓⲁ: ϧⲉⲛ ⲟⲩⲟ̀ⲩⲛⲟϥ ⲛ̀ⲁ̀ⲧⲙ̀ⲕⲁϩ.
Ⲇⲓⲕⲉⲱ̀ⲥ ⲁ̀ⲛⲟⲕ ϯⲱⲙⲥ ⲙ̀ⲙⲱⲧⲉⲛ: ϧⲉⲛ ⲟ̀ⲩⲙⲱⲟ̀ⲩ ⲛ̀ϯⲙⲉⲧⲁⲛⲟⲓⲁ: ⲫⲏⲉ̀ⲑⲛⲏⲟⲩ ϥ̀ⲛⲁϯⲱⲙⲥ ⲙ̀ⲙⲱⲧⲉⲛ: ϧⲉⲛ ⲟⲩⲡ̅ⲛ̅ⲁ̅ ⲛ̀ⲧⲉ ϯⲁ̀ⲅⲛⲓⲁ.

Ⲉⲑⲃⲉ ⲫⲁⲓ ⲁϥⲱϣ ⲉ̀ⲃⲟⲗ: ⲛ̀ϫⲉ Ⲏ̀ⲥⲁⲏ̀ⲁⲥ ⲫⲏⲉ̀ⲧⲥ̀ⲙⲁⲣⲱⲟⲩⲧ: ϫⲉ ⲧ̀ⲥ̀ⲙⲏ ⲡⲉⲧⲱϣ ⲉ̀ⲃⲟⲗ: ϩⲓⲡ̀ϣⲁϥⲉ ϫⲉ ⲥⲉⲃⲧⲉ ⲫ̀ⲙⲱⲓⲧ.
Ⲍⲱⲏ ⲫⲟⲣⲟⲥ Ⲡⲟ̅ⲥ̅ ⲡⲉⲛⲚⲟⲩϯ: ⲟⲩⲟϩ ⲥⲟⲩⲧⲉⲛ ⲛⲉϥⲙⲁⲙ̀ⲙⲟϣⲓ: ϧⲉⲗⲗⲟⲧ ⲛⲓⲃⲉⲛ ⲛⲉⲙ ⲙⲉϣϣⲟϯ: ⲉⲩⲉ̀ⲑⲉⲗⲏⲗ ϧⲉⲛ ⲟⲩⲣⲁϣⲓ.

Ⲏⲡⲡⲉ ⲅⲁⲣ Ⲓⲏ̅ⲥ̅ ⲡⲓⲢⲉϥⲛⲁⲓ: ⲁϥⲓ̀ ⲉ̀ϫⲉⲛ ⲡⲓⲒⲟⲣⲇⲁⲛⲏⲥ: ⲙ̀ⲫ̀ⲣⲏϯ ⲙ̀ⲡⲁⲓⲉ̀ϫⲱⲣϩ ⲫⲁⲓ: ⲁϥϭⲓⲱ̀ⲙⲥ ⲉ̀ⲃⲟⲗϧⲉⲛ Ⲓⲱⲁⲛⲛⲏⲥ.
Ⲑⲉⲟⲥⲉⲃⲏⲥ ⲫⲏⲉ̅ⲑ̅ⲩ̅: ⲁϥⲉⲣⲙⲉⲑⲣⲉ ⲟⲩⲟϩ ⲡⲉϫⲁϥ: ϫⲉ ⲁⲓⲛⲁⲩ ⲉ̀ⲡⲓⲠ̀ⲛⲉⲩⲙⲁ ⲉ̅ⲑ̅ⲩ̅: ⲉϥⲛⲏⲟⲩ ⲉ̀ⲡⲉⲥⲏⲧ ⲉ̀ϫⲱϥ.

Ⲓⲥ ⲟⲩⲥ̀ⲙⲏ ⲉ̀ⲃⲟⲗϧⲉⲛ Ⲫ̀ⲓⲱⲧ: ⲉⲥϫⲱ ⲙ̀ⲙⲟⲥ ⲣⲏⲧⲱⲥ ⲉⲑⲃⲏⲧⲉⲛ: ϫⲉ ⲫⲁⲓ ⲡⲉ ⲠⲁϢⲏⲣⲓ Ⲡⲁⲙⲉⲛⲣⲓⲧ: ⲉ̀ⲧⲁⲓϯⲙⲁϯ ⲛ̀ϧⲏⲧϥ.
Ⲕⲉ ⲫ̀ⲓⲟⲙ ⲁϥⲛⲁⲩ ⲁϥⲫⲱⲧ: ⲡⲓⲒⲟⲣⲇⲁⲛⲏⲥ ⲁϥⲕⲟⲧϥ ⲉ̀ⲫⲁϩⲟⲩ: ⲕⲁⲧⲁ ⲡ̀ⲥⲁϫⲓ ⲉ̀ⲧⲉⲛϩⲟⲧ: ⲛ̀Ⲇⲁⲩⲓⲇ ⲡⲓⲡ̅ⲛ̅ⲁ̅ⲧⲟⲩⲫⲟⲣⲟⲥ.

Ⲗⲟⲓⲡⲟⲛ ⲡⲉϫⲁϥ ϧⲉⲛ ⲡⲓⲯ̀ⲁⲗⲙⲟⲥ: ⲁⲩⲛⲁⲩ ⲉ̀ⲣⲟⲕ ⲛ̀ϫⲉ ϩⲁⲛⲙⲱⲟ̀ⲩ: ⲁⲩⲉ̀ⲣϩⲟϯ ⲛⲉⲙ ⲛⲓⲡⲉⲗⲁⲅⲟⲥ: ⲁⲩϣ̀ⲑⲟⲣⲧⲉⲣ ⲛ̀ϫⲉ ⲛⲓⲧⲱⲟ̀ⲩ.
Ⲙⲁⲣⲟⲩⲟ̀ⲩⲛⲟϥ ⲛ̀ϫⲉ ⲛⲓⲫⲏⲟⲩⲓ̀: ⲟⲩⲟϩ ⲙⲁⲣⲉϥⲑⲉⲗⲏⲗ ⲛ̀ϫⲉ ⲡ̀ⲕⲁϩⲓ: ⲉⲑⲃⲉ ⲡⲓⲱⲙⲥ ⲙ̀ⲡⲓⲁ̀ⲑⲛⲟⲃⲓ: Ⲓⲏ̅ⲥ̅ Ⲡⲭ̅ⲥ̅ ⲫⲁ ⲡⲓⲁ̀ⲙⲁϩⲓ.

Ⲛⲓⲡⲓⲥⲧⲟⲥ ⲙ̀ⲡ̀Ⲓⲥⲣⲁⲏ̀ⲗ ⲙ̀ⲃⲉⲣⲓ: ⲁ̀ⲙⲱⲓⲛⲓ ⲉ̀ⲡⲓⲱⲙⲥ ⲉ̅ⲑ̅ⲩ̅: ϧⲉⲛ ⲫ̀ⲣⲁⲛ ⲙ̀Ⲫ̀ⲓⲱⲧ ⲛⲉⲙ ⲡ̀Ϣⲏⲣⲓ: ⲛⲉⲙ ⲡⲓⲠ̀ⲛⲉⲩⲙⲁ ⲉ̅ⲑ̅ⲩ̅.
Ⲝⲁⲡⲓⲛⲁ ⲁϥϫⲟⲥ Ⲓⲉⲍⲉⲕⲓⲏⲗ: ϫⲉ ϯⲛⲁⲛⲟⲩϫϧ ⲉ̀ϫⲉⲛ ⲑⲏⲛⲟⲩ: ⲛ̀ⲟⲩⲙⲱⲟ̀ⲩ ⲉϥⲥⲱⲧⲡ ϧⲉⲛ ⲟⲩⲑⲉⲗⲏⲗ: ⲟⲩⲟϩ ⲛ̀ⲧⲁⲧⲟⲩⲃⲉⲑⲏⲛⲟⲩ.

Ⲟⲩϩⲏⲧ ⲛⲉⲙ ⲟⲩⲡ̅ⲛ̅ⲁ̅ ⲙ̀ⲃⲉⲣⲓ: ϯⲛⲁⲁⲓϥ ⲥⲁϧⲟⲩⲛ ⲙ̀ⲙⲱⲧⲉⲛ: ϯⲛⲁⲱ̀ⲗⲓ ⲙ̀ⲡⲓϩⲏⲧ ⲛ̀ⲱ̀ⲛⲓ: ⲉ̀ⲃⲟⲗϧⲉⲛ ⲛⲉⲧⲉⲛⲥⲁⲣⲝ ⲛ̀ⲥⲏⲟⲩ ⲛⲓⲃⲉⲛ.
Ⲡⲉϫⲁϥ ⲟⲛ ⲛ̀ϫⲉ ⲡⲓⲑ̀ⲙⲏⲓ ⲫⲁⲓ: ϫⲉ ⲯ̀ⲩⲭⲏ ⲛⲓⲃⲉⲛ ⲉⲧⲟⲛϧ: ⲉⲧⲃⲉⲣⲃⲉⲣ ⲉ̀ϫⲱⲟ̀ⲩ ⲛ̀ϫⲉ ⲡⲁⲓⲙⲱⲟ̀ⲩ ⲫⲁⲓ: ⲛ̀ⲧⲉ ⲡⲁⲓⲓⲁⲣⲟ ⲥⲉⲛⲁⲱ̀ⲛϧ.

Ⲣⲁϣⲓ ⲱ̀ ⲛⲓⲭ̀ⲣⲓⲥⲧⲓⲁⲛⲟⲥ: ϫⲉ Ⲡⲭ̅ⲥ̅ ⲁϥⲥⲱⲧⲡ ⲙ̀ⲙⲱⲧⲉⲛ: ⲟⲩⲟϩ ⲙⲏⲓⲥ ⲛⲱⲧⲉⲛ ϯⲛⲟⲩ: ⲙ̀ⲡⲓⲟ̀ⲩϫⲁⲓ ⲛ̀ⲥⲏⲟⲩ ⲛⲓⲃⲉⲛ.
Ⲥⲱⲧⲉⲙ ⲱ̀ ⲛⲓⲗⲁⲟⲥ ⲧⲏⲣⲟⲩ: ⲛⲓⲫⲩⲗⲏ ⲛⲉⲙ ⲛⲓⲁⲥⲡⲓ ⲛ̀ⲗⲁⲥ: ⲭⲱⲗⲉⲙ ⲉ̀ⲡⲓⲱⲙⲥ ⲉⲧϣⲟⲩϣⲟⲩ: ⲉⲑⲣⲉⲛϭⲓ ⲙ̀ⲡⲓⲱ̀ⲛϧ ⲉ̀ⲱ̀ⲛⲁⲥ.

Ⲧⲱⲃϩ ⲙ̀Ⲡⲟ̅ⲥ̅ ϧⲉⲛ ⲟⲩⲙⲉⲧⲁⲧϣⲟⲃⲓ: ϧⲉⲛ ⲟⲩϩⲏⲧ ⲉϥⲑⲉⲃⲓⲟ: ⲁ̀ⲙⲱⲓⲛⲓ ⲉⲑⲣⲉⲧⲉⲛ ⲉⲣⲟⲩⲱ̀ⲓⲛⲓ: ⲛ̀ⲛⲟⲩϭⲓϣⲓⲡⲓ ⲛ̀ϫⲉ ⲛⲉⲧⲉⲛϩⲟ.
Ⲩⲓⲟⲥ Ⲑⲉⲟⲥ ⲡⲓⲙⲁⲓⲣⲱⲙⲓ: ⲡⲉϫⲁϥ ϧⲉⲛ ⲧⲉϥⲉ̀ⲝⲟⲩⲥⲓⲁ: ϫⲉ ⲁⲩϣ̀ⲧⲉⲙⲙⲉⲥ ⲟⲩⲣⲱⲙⲓ: ⲉ̀ⲃⲟⲗϧⲉⲛ ⲟⲩⲙⲱⲟⲩ ⲛⲉⲙ ⲟⲩⲡ̅ⲛ̅ⲁ̅.

Ⲫⲁⲓ ⲙ̀ⲙⲟⲛ ϣ̀ϫⲟⲙ ⲙ̀ⲙⲟϥ: ⲉ̀ⲓ̀ ⲉ̀ϧⲟⲩⲛ ⲉ̀ϯⲙⲉⲧⲟⲩⲣⲟ: ⲛ̀ⲧⲉ Ⲫϯ ⲛⲉⲙ ⲡⲓⲟ̀ⲩⲛⲟϥ: ⲉⲑⲙⲏⲛ ⲉ̀ⲃⲟⲗ ⲛ̀ⲁ̀ⲧⲧⲁⲕⲟ.
Ⲭⲱ ⲛⲁⲛ ⲉ̀ⲃⲟⲗ ⲛ̀ⲛⲉⲛⲁ̀ⲛⲟⲙⲓⲁ: ϩⲓⲧⲉⲛ ⲛⲓⲧⲱⲃϩ ⲛ̀ⲧⲉ ϯⲡ̀ⲣⲟⲥⲧⲁⲧⲏⲥ: ⲧⲉⲛⲟ̅ⲥ̅ ⲛ̀ⲛⲏⲃ ⲧⲏⲣⲉⲛ Ⲙⲁⲣⲓⲁ: ⲛⲉⲙ Ⲓⲱⲁⲛⲛⲏⲥ ⲡⲓⲂⲁⲡⲧⲓⲥⲧⲏⲥ.

Ⲯⲩⲭⲏ ⲛⲓⲃⲉⲛ ⲛ̀ⲛⲓⲡⲓⲥⲧⲟⲥ: ⲛⲏⲉ̀ⲧⲁⲩⲉ̀ⲛⲕⲟⲧ ⲙⲁⲙ̀ⲧⲟⲛ ⲛⲱⲟ̀ⲩ: ϫⲱⲕⲧⲉⲛ ⲉ̀ⲃⲟⲗ ⲛ̀ⲭ̀ⲣⲓⲥⲧⲓⲁⲛⲟⲥ: ⲓⲥϫⲉⲛ ϯⲛⲟⲩ ϣⲁ ⲡ̀ϫⲱⲕ ⲉ̀ⲃⲟⲗ.
Ⲱ̀ⲟⲩⲛ̀ϩⲏⲧ ⲉ̀ϫⲱⲓ ⲡⲁⲚⲏⲃ: ⲛⲁϩⲙⲉⲧ ⲉ̀ⲃⲟⲗϧⲉⲛ ⲛⲁϫⲁϫⲓ: ⲛⲏⲉ̀ⲑⲟ̀ⲩⲱ̀ⲛϩ ⲉ̀ⲃⲟⲗ ⲛⲉⲙ ⲛⲏⲉ̀ⲧϩⲏⲡ: ϫⲱⲣ ⲙ̀ⲡⲟⲩⲥⲟϭⲛⲓ ϧⲉⲛ ⲟⲩϭⲟϫⲓ.