Psali Adam - Sunday :: Ⲁ̀Ⲡⲟ̅ⲥ̅ ⲉⲣⲟ̀ⲩⲣⲟ :: إبصاليه آدام - الأحد

Ⲁ̀Ⲡⲟ̅ⲥ̅ ⲉⲣⲟ̀ⲩⲣⲟ: ⲁϥⲑⲉⲗⲏⲗ ⲛ̀ϫⲉ ⲡ̀ⲕⲁϩⲓ: ϫⲉ ⲛ̀ⲑⲟϥ ⲡⲉ ⲡ̀Ⲟⲩⲣⲟ: ⲟⲩⲟϩ ⲫⲁ ⲡⲓⲁ̀ⲙⲁϩⲓ.
Ⲃⲁⲡⲧⲓⲥⲧⲓⲛ ⲙ̀ⲙⲟⲓ: ⲱ̀ ⲡⲓⲡ̀ⲣⲟⲇⲣⲟⲙⲟⲥ: ⲟⲩⲟϩ ϧⲱⲛⲧ ⲉ̀ⲣⲟⲓ: ϫⲉ ⲁ̀ⲛⲟⲕ ⲡⲉ Ⲓⲏ̅ⲥ̅.

Ⲅⲉ ⲅⲁⲣ ⲉⲑⲃⲉ ⲡⲁⲓϩⲱⲃ: ⲁⲓⲓ̀ ⲉ̀ⲡⲓⲕⲟⲥⲙⲟⲥ: ϩⲓⲛⲁ ⲛ̀ⲧⲁⲉ̀ⲣϩⲱⲃ: ⲙ̀ⲡⲉⲧⲉϩⲛⲏⲓ ⲕⲁⲗⲱⲥ.
Ⲇⲁⲩⲓⲇ ⲅⲁⲣ ⲁϥϫⲟⲥ: ϧⲉⲛ ⲟⲩⲛⲓϣϯ ⲛ̀ϧ̀ⲣⲱⲟ̀ⲩ: ϫⲉ ⲡ̀ϧ̀ⲣⲱⲟ̀ⲩ ⲙ̀Ⲡⲟ̅ⲥ̅: ⲉ̀ϩ̀ⲣⲏⲓ ϩⲓϫⲉⲛ ⲛⲓⲙⲱⲟ̀ⲩ.

Ⲉⲑⲃⲉ ⲫⲁⲓ ⲁϥⲧⲁⲙⲟⲛ: ϧⲉⲛ ⲟⲩⲡⲁⲣⲣⲏⲥⲓⲁ: ⲉⲑⲃⲉ ⲡⲁⲓⲙⲩⲥⲧⲏⲣⲓⲟⲛ: ⲛ̀ⲧⲉ ϯⲉⲕⲕⲗⲏⲥⲓⲁ.
Ⲍⲁⲭⲁⲣⲓⲁⲥ ⲁϥⲙⲓⲥⲓ: ⲙ̀ⲡⲁⲓⲕⲩⲣⲓⲝ ⲉ̀ⲧⲉⲛϩⲟⲧ: ϩⲓⲛⲁ ⲛ̀ⲧⲉϥϭⲓⲥⲓ: ⲛ̀ϫⲉ ⲡ̀ⲧⲁⲓⲟ ⲛ̀ⲛⲓϧⲉⲗⲗⲟⲧ.

Ⲏ̀ⲥⲁⲏ̀ⲁⲥ ⲁϥⲱϣ: ϧⲉⲛ ⲧⲉϥⲙⲉⲧⲥⲁⲃⲉ: ϫⲉ ⲛ̀ⲑⲟⲕ ⲡⲉ ⲡ̀ϧ̀ⲣⲱⲟ̀ⲩ ⲉⲧⲱϣ: ⲛ̀ϩ̀ⲣⲏⲓ ϩⲓ ⲡ̀ϣⲁϥⲉ.
Ⲑⲉⲗⲏⲗ ⲱ̀ ⲡⲓⲒⲟⲣⲇⲁⲛⲏⲥ: ⲟ̀ⲩⲛⲟϥ ⲙ̀ⲙⲟⲕ ⲫ̀ⲓⲟⲙ: ⲁϥⲓ̀ ϣⲁⲣⲟⲕ ⲛ̀ϫⲉ Ⲓⲱⲁⲛⲛⲏⲥ: ⲫ̀ⲣⲉϥⲓ̀ⲣⲓ ⲛ̀ⲛⲓϫⲟⲙ.

Ⲓⲏ̅ⲥ̅ ⲫⲁ ⲡⲓⲱ̀ⲟⲩ: ⲁϥⲙⲟϣⲓ ⲛⲉⲙⲁϥ: ⲉⲑⲣⲉϥϭⲓⲱⲙⲥ ϧⲉⲛ ⲛⲓⲙⲱⲟ̀ⲩ: ⲕⲁⲧⲁ ⲡⲉⲧⲉϩⲛⲁϥ.
Ⲕⲁⲗⲱⲥ ⲁϥⲓ̀ ϣⲁⲣⲟⲛ: ⲡⲉϫⲱⲟ̀ⲩ ⲛ̀ϫⲉ ⲛⲓⲙⲱⲟ̀ⲩ: ϩⲓⲛⲁ ⲛ̀ⲧⲉϥⲧⲁϫⲣⲟⲛ: ⲛ̀ϫⲉ Ⲓⲏ̅ⲥ̅ ⲫⲁ ⲡⲓⲱ̀ⲟ̀ⲩ.

Ⲗⲉⲗⲓ ⲙ̀ⲡⲓϩⲱⲥ: ϯⲛⲁⲧⲏⲓⲧⲟⲩ ⲉ̀ⲧⲉⲕⲙⲉⲧⲛⲓϣϯ: ⲁ̀ⲛⲟⲕ ⲛⲉⲙⲱⲟ̀ⲩ ⲕⲁⲗⲱⲥ: ϫⲉ ⲛ̀ⲑⲟⲕ ⲡⲉ ⲡⲉⲛⲛⲁϣϯ.
Ⲙⲁⲣⲟⲩⲟ̀ⲩⲛⲟϥ ⲙ̀ⲫⲟⲟ̀ⲩ: ⲛ̀ϫⲉ ⲛⲓⲛⲏⲥⲟⲥ: ⲉⲧⲕⲱϯ ⲉ̀ⲣⲱⲟⲩ ⲛ̀ϫⲉ ⲟⲩϭ̀ⲏⲡⲓ ⲛⲉⲙ ⲟⲩⲅ̀ⲛⲟⲫⲟⲥ.

Ⲛⲓⲡ̀ⲣⲟⲫⲏⲧⲏⲥ ⲛ̀ⲑⲱⲟ̀ⲩ: ⲕⲁⲧⲁ ⲫ̀ⲟ̀ⲩⲁⲓ ⲫ̀ⲟ̀ⲩⲁⲓ: ⲁⲩϫⲉ Ⲫϯ ⲛ̀ⲧⲉ ⲡ̀ⲱ̀ⲟ̀ⲩ: ⲁϥⲉ̀ⲣϧⲁⲣⲁⲃⲁⲓ.
Ⲝⲁⲡⲓⲛⲁ ⲁϥⲙⲟϣⲓ: ϧⲉⲛ ⲟⲩⲛⲓϣϯ ⲛ̀ⲑⲉⲃⲓⲟ: ⲛ̀ϫⲉ ⲫⲏⲈ̀ⲧϭⲟⲥⲓ: ⲟⲩⲟϩ ⲡⲓⲢⲉϥⲑⲁⲙⲓⲟ.

Ⲟⲩⲟϩ ⲁϥϫⲱⲕ ⲉ̀ⲃⲟⲗ: ϧⲉⲛ ⲟⲩⲡ̅ⲛ̅ⲁ̅ ⲉϥⲧⲉⲛⲛⲏⲟⲩⲧ: ϩⲓⲛⲁ ⲛ̀ⲧⲉϥϫⲱⲕ ⲉ̀ⲃⲟⲗ: ⲛ̀ϫⲉ ⲫⲏⲉⲧⲥ̀ϧⲏⲟⲩⲧ.
ⲠⲓⲠ̀ⲛⲉⲩⲙⲁ ⲛ̀ⲧⲉ ϯⲙⲉⲑⲙⲏⲓ: ⲙ̀ⲫ̀ⲣⲏϯ ⲛ̀ⲟ̀ⲩϭⲣⲟⲙⲡⲓ: ⲁϥⲓ̀ ϧⲉⲛ ⲟ̀ⲩⲙⲉⲑⲙⲏⲓ: ⲉ̀ϫⲉⲛ ⲫ̀ⲣⲉϥⲑⲁⲙⲓⲟ ⲛ̀ⲛⲓⲣⲟⲙⲡⲓ.

Ⲣⲁⲛ ⲛⲓⲃⲉⲛ ⲉⲧϭⲟⲥⲓ: ⲛ̀ⲧⲉ ⲛⲓⲁ̀ⲥⲱⲙⲁⲧⲟⲥ: ⲉⲩϩⲱⲥ ⲉ̀ⲫⲏⲉ̀ⲧϭⲟⲥⲓ: ⲡⲉⲛⲟ̅ⲥ̅ Ⲓⲏ̅ⲥ Ⲡⲭ̅ⲥ̅.
Ⲥⲱⲧⲉⲙ ⲉ̀ⲧ̀ⲥ̀ⲙⲏ ⲁϥⲫⲓⲣⲓ: ⲁϥⲉⲣⲙⲉⲑⲣⲉ ⲉⲑⲃⲏⲧϥ: ϫⲉ ⲫⲁⲓ ⲡⲉ ⲠⲁϢⲏⲣⲓ: ⲉ̀ⲧⲁⲓϯⲙⲁϯ ⲛ̀ϧⲏⲧϥ.

Ⲧⲟⲧⲉ ⲁϥϫⲱⲕ ⲉ̀ⲃⲟⲗ: ⲛ̀ϫⲉ ⲡ̀ⲥⲁϫⲓ ⲙ̀ⲡ̀ⲣⲟⲫⲏⲧⲏⲥ: ϫⲉ Ⲡⲟ̅ⲥ̅ ⲛⲁⲕⲓⲙ ⲉ̀ⲃⲟⲗ: ⲙ̀ⲡ̀ϣⲁϥⲉ ⲉ̀Ⲕⲁⲇⲏⲥ.
Ⲩⲓⲟⲥ Ⲑⲉⲟⲥ ⲁϥⲟⲩⲱ̀ⲛϩ: ϧⲉⲛ ⲡⲉϥⲛⲓϣϯ ⲛ̀ϩⲱⲃ: ϩⲁⲛⲓⲁⲣⲱⲟ̀ⲩ ⲉⲩⲕⲱⲗϩ: ϧⲉⲛ ⲛ̀ⲟⲩϫⲓϫ ⲉⲩⲥⲟⲡ.

Ⲫ̀ⲓⲟⲙ ⲁϥⲛⲁⲩ ⲁϥⲫⲱⲧ: ⲁ̀ⲡⲓⲒⲟⲣⲇⲁⲛⲏⲥ ⲕⲟⲧϥ ⲉ̀ⲫⲁϩⲟ: ⲉ̀ⲧⲁⲩⲛⲁⲩ ⲉ̀ⲡⲓⲢⲉϥⲥⲱⲛⲧ: ϧⲉⲛ ⲟⲩⲥ̀ⲑⲉⲣⲧⲉⲣ ⲁⲩⲙⲁϩⲟⲩ.
Ⲭ̀ⲟⲩⲁⲃ ϣⲟⲙⲧ (ⲅ̅) ⲁⲝⲓⲱⲥ: Ⲫϯ ⲡⲓⲙⲁⲓⲣⲱⲙⲓ: ϫⲉ ⲛ̀ⲑⲟⲕ ⲁⲕϭⲓⲱⲙⲥ: ⲁⲕⲓⲱⲓ ⲛ̀ⲛⲉⲛⲛⲟⲃⲓ.

Ⲯⲩⲭⲏ ⲛⲓⲃⲉⲛ ⲉⲩⲥⲟⲡ: ⲛ̀ⲧⲉ ⲛⲓⲭ̀ⲣⲓⲥⲧⲓⲁⲛⲟⲥ: ⲙⲟⲓ ⲛⲱⲟⲩ ⲛ̀ⲟⲩⲭ̀ⲃⲟⲃ: ϧⲉⲛ ⲡⲓⲡⲁⲣⲁⲇⲓⲥⲟⲥ.
Ⲱ̀ⲟⲩⲛ̀ϩⲏⲧ ⲉ̀ϫⲱⲓ: ⲁ̀ⲛⲟⲕ ⲡⲓⲉ̀ⲗⲁⲭⲓⲥⲧⲟⲥ: ⲟⲩⲟϩ ⲛⲟϩⲉⲙ ⲙ̀ⲙⲟⲓ: ⲉ̀ⲃⲟⲗϧⲉⲛ ⲡⲓⲧⲩⲣⲁⲛⲛⲟⲥ.