Psali Adam - Tuesday :: ⲀⲡⲓⲆⲩⲙⲓⲟⲩⲣⲅⲟⲥ :: إبصاليه آدام - يوم الثلاثاء

ⲀⲡⲓⲆⲩⲙⲓⲟⲩⲣⲅⲟⲥ: ϣⲉⲛϩⲏⲧ ϧⲁ Ⲁ̀ⲇⲁⲙ: ⲁϥϣⲁⲓ ⲥⲱⲙⲁⲧⲓⲕⲱⲥ: ⲉ̀ⲃⲟⲗ ϧⲉⲛ Ⲙⲁⲣⲓⲁⲙ.
Ⲃⲟⲛ ⲛⲓⲃⲉⲛ ⲉⲩϩⲱⲥ: ⲛⲉⲙ ⲛⲓⲁ̀ⲅⲅⲉⲗⲟⲥ: ⲱ̀ Ⲩⲓⲟⲥ Ⲑⲉⲟⲥ: ⲛ̀Ⲇⲩⲙⲓⲟⲩⲣⲅⲟⲥ.

+ Ⲅⲉⲛⲟⲥ ⲛ̀ⲛⲓⲡⲓⲥⲧⲟⲥ: ⲉⲩⲣⲁϣⲓ ϧⲉⲛ ϩⲁⲛϩⲩⲙⲛⲟⲥ: ⲉⲑⲃⲉ ⲡⲓϫ̀ⲫⲟ ⲙ̀Ⲡⲭ̅ⲥ̅: ⲉ̀ⲃⲟⲗϧⲉⲛ ϯⲠⲁⲣⲑⲉⲛⲟⲥ.
+ Ⲇⲁⲩⲓⲇ ⲡ̀ⲟⲩⲣⲟ ⲁϥⲥⲁϫⲓ: ϧⲉⲛ ⲧⲉϥⲡ̀ⲣⲟⲫⲏⲧⲓⲁ: ⲉⲑⲃⲉ ⲡ̀ϫⲓⲛⲙⲓⲥⲓ: ⲙ̀Ⲡⲭ̅ⲥ̅ ⲡⲓⲀⲓⲇⲓⲁ̀.

Ⲉⲑⲃⲉ ϯⲑⲉⲟ̀ⲧⲟⲕⲟⲥ: ⲁⲛⲥⲟⲩⲉⲛ Ⲡⲭ̅ⲥ̅: ⲁ̀ⲙⲱⲓⲛⲓ ⲙⲁⲣⲉⲛϩⲱⲥ ⲉ̀ⲣⲟϥ: ⲛⲉⲙ ⲛⲓⲁ̀ⲅⲅⲉⲗⲟⲥ.
Ϣⲁϣϥ (ⲍ̅) ⲛ̀ⲧⲁⲅⲙⲁ ⲛⲓⲃⲉⲛ: ⲉⲧϧⲉⲛ ⲟⲩⲣⲁⲛⲟⲥ: ⲛⲉⲙ ⲛⲓⲁ̀ⲥⲡⲓ ⲛⲓⲃⲉⲛ: ⲉⲩϩⲱⲥ ⲉ̀ⲡ̀Ⲟⲩⲣⲟ Ⲡⲭ̅ⲥ̅.

+ Ⲏⲡⲡⲉ ⲛⲓⲙⲁⲛⲉ̀ⲥⲱⲟ̀ⲩ: Ⲅⲁⲃⲣⲓⲏⲗ ⲡⲓⲁ̀ⲅⲅⲉⲗⲟⲥ: ⲙ̀ⲫⲟⲟ̀ⲩ ⲁϥϩⲓⲱⲓϣ ⲙ̀ⲙⲱⲟⲩ: ⲉⲑⲃⲉ ⲡⲓϫ̀ⲫⲟ ⲙ̀Ⲡⲭ̅ⲥ̅.
+ Ⲑⲱⲕ ⲧⲉ ϯϫⲟⲙ ⲛⲉⲙ ⲡⲓⲱ̀ⲟ̀ⲩ: ϣⲁ ϯⲥⲩⲛⲧⲉⲗⲓⲁ: ⲱ̀ ⲡ̀Ⲟⲩⲣⲟ ⲛ̀ⲧⲉ ⲡ̀ⲱ̀ⲟⲩ: ⲡ̀Ϣⲏⲣⲓ ⲙ̀Ⲙⲁⲣⲓⲁ.

Ⲓⲏ̅ⲥ̅ ⲡⲓⲙⲟⲛⲟⲅⲉⲛⲏⲥ: ⲛ̀ⲧⲉ Ⲫϯ Ⲫ̀ⲓⲱⲧ: ⲁⲛⲛⲁⲩ ⲉ̀ⲣⲟϥ ⲁϭⲛⲉ ⲥⲁⲛⲏⲥ: ϧⲉⲛ ⲕⲉⲛϥ ⲛ̀ⲑⲏⲉ̀ⲧⲥ̀ⲙⲁⲣⲱⲟⲩⲧ.
Ⲕⲩⲣⲓⲟⲥ ⲡⲓⲢⲉϥⲛⲟϩⲉⲙ: ⲁⲥⲙⲓⲥⲓ ⲙ̀ⲙⲟϥ ϩⲱⲥ Ⲛⲟⲩϯ: ⲙ̀ⲫⲟⲟⲩ ϧⲉⲛ Ⲃⲏⲑⲗⲉⲉⲙ: ⲁϥⲓ̀ ⲉⲑⲃⲉ ⲡⲉⲛⲥⲱϯ.

+ Ⲗⲉⲗⲓ ⲱ̀ ⲛⲓⲙⲁⲅⲟⲥ: ⲛⲉⲙ ⲛⲓⲙⲁⲛⲉ̀ⲥⲱⲟⲩ: ϫⲉ Ⲡⲭ̅ⲥ̅ ⲡⲓⲖⲟⲅⲟⲥ: ⲁϥⲟⲩⲱⲛϩ ⲛⲁⲛ ⲙ̀ⲫⲟⲟ̀ⲩ.
+ Ⲙⲁⲣⲉⲛϩⲱⲥ ⲉ̀ⲣⲟϥ: ⲛⲉⲙ ⲛⲓⲁ̀ⲅⲅⲉⲗⲟⲥ: ⲟⲩⲟϩ ⲧⲉⲛⲟ̀ⲩⲱ̀ϣⲧ ⲙ̀ⲙⲟϥ: ϫⲉ ⲛ̀ⲑⲟϥ ⲡⲉ ⲡⲓⲙⲁⲓⲣⲱⲙⲓ.

Ⲛⲓⲡ̀ⲣⲟⲫⲏⲧⲏⲥ ⲉⲩⲣⲁϣⲓ: ⲛⲉⲙ ⲛⲓⲇⲓⲕⲉⲟⲥ: ⲉⲑⲃⲉ ⲡ̀ϫⲓⲛⲙⲓⲥⲓ: ⲙ̀ⲡ̀Ⲥⲱⲧⲏⲣ ⲙ̀ⲡⲓⲕⲟⲥⲙⲟⲥ.
Ⲝⲙⲁⲣⲱⲟⲩⲧ ⲁ̀ⲗⲏⲑⲱⲥ: ⲱ̀ ⲡⲉⲛⲤⲱⲧⲏⲣ ⲏ̀ⲙⲱⲛ: Ⲕⲩⲣⲓⲟⲥ ⲡⲓⲁ̀ⲅⲁⲑⲟⲥ: ⲕⲉ ⲧⲟⲩ ⲡ̅ⲛ̅ⲁ̅ⲧⲓ ⲁⲅⲓⲟⲛ.

+ Ⲟⲩⲥⲓⲟⲩ ⲁϥϣⲁⲓ: ⲙ̀ⲫⲟⲟ̀ⲩ ϧⲉⲛ ⲛⲓⲙⲁⲛ̀ϣⲁⲓ: ϫⲉ ⲫⲁⲓ ⲡⲉ ⲡⲓⲙⲏϣ ⲛ̀ⲛⲁⲓ: ⲁϥⲓ̀ ⲉⲑⲃⲉ ⲡⲉⲛⲟ̀ⲩϫⲁⲓ.
+ ⲠⲓϨⲓⲏⲃ ⲛ̀ⲧⲉ Ⲫϯ: ⲁϥⲓ̀ ⲉ̀ⲡⲓⲕⲟⲥⲙⲟⲥ: ⲉ̀ⲃⲟⲗϧⲉⲛ ϯⲙⲁⲥⲛⲟⲩϯ: Ⲙⲁⲣⲓⲁ ϯⲠⲁⲣⲑⲉⲛⲟⲥ.

Ⲣⲁϣⲓ ⲱ̀ ⲛⲓⲡⲓⲥⲧⲟⲥ: ⲙ̀ⲫⲟⲟ̀ⲩ ⲟⲩⲟϩ ⲑⲉⲗⲏⲗ: ⲉⲑⲃⲉ ⲡⲓϫ̀ⲫⲟ ⲙ̀Ⲡⲭ̅ⲥ̅: ⲡⲉⲛⲟ̅ⲥ̅ Ⲉⲙⲙⲁⲛⲟⲩⲏⲗ.
Ⲥⲟⲙⲥ ⲥⲱⲧⲉⲙ ⲉ̀ⲣⲟⲛ: ⲁ̀ⲛⲟⲛ ϧⲁ ⲡⲉⲕⲗⲁⲟⲥ: ⲛⲁϩⲙⲉⲛ ϩⲁ ⲛⲓⲇⲉⲙⲟⲛ: ⲱ̀ ⲡ̀Ϣⲏⲣⲓ ⲛ̀ⲧⲁⲟ̅ⲥ̅.

+ Ⲧⲉⲛϩⲱⲥ ⲧⲉⲛⲥ̀ⲙⲟⲩ ⲉ̀ⲣⲟⲕ: ϧⲉⲛ ϩⲁⲛⲇⲟⲝⲟⲗⲟⲅⲓⲁ: ⲟⲩⲟϩ ⲧⲉⲛϣⲉⲙϣⲓ ⲙ̀ⲙⲟⲕ: ⲱ̀ ⲡⲓⲖⲟⲅⲟⲥ ⲛ̀Ⲁⲓⲇⲓⲁ.
+ Ⲩⲓⲟⲥ Ⲑⲉⲟⲥ ⲡⲉⲛⲚⲟⲩϯ: ⲁ̀ⲣⲉϩ ⲉ̀ⲡⲉⲕⲗⲁⲟⲥ: ⲉ̀ⲃⲟⲗϩⲁ ⲟⲩϩⲟϯ: ⲛⲉⲙ ⲛⲓⲡⲓⲣⲁⲥⲙⲟⲥ.

Ⲫϯ ⲫⲏⲉ̀ⲧⲱ̀ⲗⲓ: ⲙ̀ⲫ̀ⲛⲟⲃⲓ ⲙ̀ⲡⲓⲕⲟⲥⲙⲟⲥ: ⲭⲱ ⲛⲁⲛ ⲉ̀ⲃⲟⲗ ⲛ̀ⲛⲉⲛⲛⲟⲃⲓ: ⲉⲑⲃⲉ ϯⲠⲁⲣⲑⲉⲛⲟⲥ.
Ⲭⲉⲣⲉ ϯⲠⲁⲣⲑⲉⲛⲟⲥ: ϯϣⲉⲗⲉⲧ Ⲙⲁⲣⲓⲁⲙ: ⲭⲉⲣⲉ ϯⲡⲟⲗⲓⲥ ⲙ̀Ⲡⲟ̅ⲥ̅: ⲉ̀ⲑⲟⲩⲁⲃ Ⲃⲏⲑⲗⲉⲉⲙ.

+ Ⲯⲩⲭⲱⲟ̀ⲩ ⲙⲁⲙ̀ⲧⲟⲛ ⲛⲱⲟⲩ: ϧⲉⲛ ⲡⲓⲡⲁⲣⲁⲇⲓⲥⲟⲥ: ⲉⲑⲃⲉ ϯⲟⲩⲣⲱ: ϯⲑⲉⲟⲧⲟⲕⲟⲥ.
+ Ⲱ̀ⲫⲏⲉ̀ⲧⲁⲩⲙⲁⲥϥ: ⲉⲑⲃⲉ ⲡ̀ⲥⲱϯ ⲙ̀ⲡⲉⲛⲅⲉⲛⲟⲥ: ⲟⲩⲟϩ ϧⲉⲛ ⲧ̀ⲥⲁⲣⲝ ⲁⲩⲁϣϥ: ⲁ̀ⲣⲉϩ ⲉ̀ⲡⲉⲕⲗⲁⲟⲥ.