Special Hymn - 1 :: Ⲡⲁⲥⲁϧ ⲛ̀ϩⲁⲛⲟⲩⲃ :: لحن خاص - 1

Ⲡⲁⲥⲁϧ ⲛ̀ϩⲁⲛⲟⲩⲃ: ⲁ̀ⲙⲟⲩ ⲛ̀ⲧⲁⲓⲉⲣⲃⲏ: ⲛ̀ⲧⲁϯⲛⲁⲕ ⲙ̀ⲡⲓⲛⲟⲩⲃ ⲉⲧⲥⲱⲧⲡ ⲧⲉⲕⲑⲁⲙⲓⲟ̀ ⲛⲏⲓ ⲛ̀ⲟⲩⲭ̀ⲗⲟⲙ ⲛ̀ⲟⲩⲣⲟ: ⲕⲁⲧⲁ ⲡ̀ⲧⲁⲓⲟ̀ ⲙ̀ⲡⲁⲓ Ⲙⲉⲗⲓⲧⲟⲛ ⲡⲓⲁ̀ⲅⲓⲟⲥ Ⲅⲉⲱⲣⲅⲓⲟⲥ.

Ⲃⲁⲣⲁⲗⲉⲝ
Ⲡⲁⲃⲁⲗ ⲛ̀ⲛⲉϩⲡⲁⲓϥⲱⲓ ⲟ̀ⲕⲉⲣⲟⲩⲥ: ⲧⲁⲓ ⲟⲩⲟ̀ϫⲓ ⲙ̀ⲃⲉⲣⲧ ⲡ̀ϩⲟ ⲛ̀ⲟⲩⲣⲟ ⲡⲁⲓ Ⲙⲉⲗⲓⲧⲟⲛ ⲛ̀ϣⲟⲩ ⲧⲁⲓⲟϥ: ⲡⲓⲁ̀ⲅⲓⲟⲥ Ⲅⲉⲱⲣⲅⲓⲟⲥ.

Ⲥⲱⲧⲉⲙ ⲉ̀ⲡ̀ⲥⲁϧ ⲁⲃⲃⲁ Ⲭ̀ⲣⲓⲥⲑⲟⲇⲟⲗⲟⲩ: ⲡⲓⲉ̀ⲡⲓⲥⲕⲟⲡⲟⲥ ⲛ̀Ⲧⲟⲣⲟⲥ ⲡⲟⲗⲓⲥ: ⲉϥϫⲱ ⲙ̀ⲡ̀ⲧⲁⲓⲟ̀ ⲙ̀ⲡⲁⲓ Ⲙⲉⲗⲓⲧⲟⲛ: ⲡⲓⲁ̀ⲅⲓⲟⲥ Ⲅⲉⲱⲣⲅⲓⲟⲥ.

Ⲡⲉϫⲁϥ ϫⲉ ⲟⲩⲛⲓϣϯ ⲡⲉ ϩⲓⲧⲉⲛ ⲧⲉϥⲡⲟⲗⲓⲟⲥ: ⲟⲩⲙⲉⲧⲡ̀ⲣⲟⲡⲟⲗⲓⲧⲏⲥ ϩⲓⲧⲉⲛ ⲧⲉϥⲥⲩⲅⲅⲉⲛⲓⲁ̀: ⲛ̀ⲑⲟϥ ⲟⲩ ⲉ̀ⲃⲟⲗϧⲉⲛ ϯⲔⲁⲡⲡⲁⲇⲟⲕⲓⲁ̀.

Ⲥ̀ϭⲟⲥⲓ ⲛ̀ϫⲉ ⲧⲉϥⲥⲩⲅⲅⲉⲛⲓⲁ̀: ⲛⲉⲙ ⲡ̀ⲧⲁⲓⲟ̀ ⲙ̀ⲡⲉϥⲁ̀ⲝⲓⲱ̀ⲙⲁ: ⲛⲉⲙ ϯⲙⲉⲑⲛⲓϣϯ ⲛ̀ⲛⲉϥⲓⲟϯ: ⲥⲱⲧⲉⲙ ⲉ̀ⲣⲟⲓ ⲛ̀ⲧⲁϫⲟⲥ ⲛⲱⲧⲉⲛ.

Ⲁ̀ⲫ̀ⲣⲁⲛ ⲙ̀ⲡⲉϥⲓⲱⲧ ⲡⲉ Ⲁ̀ⲛⲁⲥⲧⲁⲥⲓⲟⲥ: ⲡ̀ⲁⲣⲭⲱⲛ ⲛ̀ⲧⲉ Ⲧⲩⲣⲟⲥ ⲡⲟⲗⲓⲥ: ⲉϥϧⲏⲕ ⲙ̀ⲙⲁⲧⲟⲓ ⲧⲟⲓ ⲉ̀ⲡⲟⲛⲟⲩⲙⲉⲣⲓⲟⲛ ⲛ̀ⲧⲉ ⲡ̀ⲟⲩⲣⲟ ⲛ̀ⲧⲉ ϯⲔⲁⲡⲡⲁⲇⲟⲕⲓⲁ̀.

Ⲫ̀ⲣⲁⲛ ⲛ̀ⲧⲉϥⲙⲁⲩ ⲡⲉⲈⲩⲥⲉⲃⲓⲁ̀: ϯⲥⲁⲃⲏ ⲙ̀ⲥⲉⲙⲛⲉ ⲕⲁⲧⲁ ⲡⲉⲥⲅⲉⲛⲟⲥ: ⲟⲩⲟⲛ ⲛ̀ⲧⲁⲥ ⲛ̀ⲥⲱⲛⲓ ⲃ̅ϯ ⲙ̀ⲡⲁⲣⲑⲉⲛⲟⲥ: ⲉ̀ⲧⲉ Ⲙⲁⲧⲣⲟⲛⲁ̀ ⲛⲉⲙ Ⲕⲁⲥⲓⲁ̀.