A third Psali Adam for Annunciation :: Ⲁⲣⲓⲯⲁⲗⲓⲛ ⲉ̀Ⲡⲟ̅ⲥ̅

Ⲁⲣⲓⲯⲁⲗⲓⲛ ⲉ̀Ⲡⲟ̅ⲥ̅: ⲫⲏⲉ̀ⲧϣⲟⲡ ϧⲉⲛ Ⲥⲓⲱⲛ: ⲟⲩⲟϩ ⲙⲱⲓⲛⲓ ⲛ̀ⲟⲩⲕⲉⲙⲕⲉⲙ: ⲛⲉⲙ ⲛⲓⲯⲁⲗⲧⲏⲣⲓⲟⲛ.
Ⲃⲟⲏ̀ⲑⲓⲁ̀ ⲅⲁⲣ ⲛⲓⲃⲉⲛ: ⲛⲉⲙ ⲛⲓϫⲟⲙ ⲉⲧϭⲟⲥⲓ: ⲉⲩⲉ̀ϣⲱⲡⲓ ⲛⲉⲙⲁⲛ: ϧⲉⲛ ⲫⲁⲓ ⲥⲏⲟⲩ ⲉⲧϭⲟⲥⲓ.

Ⲅⲉⲛⲟⲥ ⲛⲓⲃⲉⲛ ⲛⲓⲣⲱⲙⲓ: ⲛ̀ⲛⲓⲭ̀ⲣⲓⲥⲧⲓⲁ̀ⲛⲟⲥ: ⲁ̀Ⲫϯ ⲛⲉⲙⲱⲟⲩ: ϧⲉⲛ ⲛⲟⲩⲇⲓⲱⲅⲙⲟⲥ.
Ⲇⲉⲥⲡⲟⲧⲁ ⲛⲁⲓ ⲛⲏⲓ: ⲟⲩⲟϩ ⲙⲁⲕⲁϯ ⲛⲏⲓ: ⲁ̀ⲣⲉϩ ⲉ̀ⲧⲁⲙⲉⲑⲙⲏⲓ: ⲥⲁⲙ̀ⲛⲁⲓ ⲛⲉⲙ ⲥⲁⲙ̀ⲛⲏ.

Ⲉⲑⲣⲉⲕⲧⲁⲗϭⲟ ⲛ̀ⲛⲓϣⲱⲛⲓ: ⲛ̀ⲧⲉ ⲧⲁⲯⲩⲭⲏ: ϫⲉ ⲛ̀ⲑⲟⲕ ⲉⲕⲉ̀ⲥⲱϯ: ⲁⲕϣⲉⲡ ⲉ̀ⲧⲁⲡ̀ⲣⲟⲥⲉⲩⲭⲏ.
ⲋ ⲛ̀ⲁ̀ⲃⲟⲧ: ⲁⲩⲟⲩⲱⲣⲡ ⲛ̀Ⲅⲁⲃⲣⲓⲏⲗ: ⲁϥϩⲓⲱⲓϣ ⲙ̀Ⲙⲁⲣⲓⲁ̀: ⲑ̀ⲙⲁⲩ ⲛ̀Ⲉⲙⲙⲁⲛⲟⲩⲏⲗ.

Ⲍⲉⲧⲏⲥⲓⲥ ⲉⲩϩⲱⲟⲩ: Ⲫϯ ⲡⲓⲙⲁⲓⲣⲱⲙⲓ: ⲕⲟⲣϥⲟⲩ ϧⲉⲛ ⲧⲉⲕϫⲟⲙ: ⲛⲉⲙ ⲫ̀ⲑⲟⲛⲟⲥ ϩⲱⲙⲓ.
Ⲏⲣⲏⲛⲏ ⲛⲉⲙ ϯⲁ̀ⲅⲁⲡⲏ: ⲛⲉⲙ ⲟⲩϩ̀ⲙⲟⲧ ⲉⲧϫⲏⲕ ⲉ̀ⲃⲟⲗ: ⲭⲱ ⲛ̀ϧ̀ⲣⲏⲓ ⲛ̀ϧⲏⲧⲉⲛ: ⲥⲁϧⲟⲩⲛ ⲛⲉⲙ ⲥⲁⲃⲟⲗ.

Ⲑⲉⲟ̀ⲥ ⲡⲓⲡⲁⲛⲧⲟⲕⲣⲁⲧⲱⲣ: ⲛⲉⲙ ⲡⲉϥⲗⲟⲅⲟⲥ ⲛ̀ϣⲏⲣⲓ: ⲛⲉⲙ ⲡⲓⲡ̅ⲛ̅ⲁ ⲉ̅ⲑ̅ⲩ̅: ⲛ̀ⲑⲟⲕ ⲟⲩⲛⲟⲩϯ ⲛ̀ϫⲱⲣⲓ.
Ⲓⲥ ϩⲏⲡⲡⲉ ⲧⲉⲛϣⲟⲩϣⲟⲩ: ⲙ̀ⲙⲟⲛ ϧⲉⲛ ⲡⲉⲕⲛⲁϩϯ: ⲅ̅ ⲛ̀ϩⲩⲡⲟⲥⲧⲁⲥⲓⲥ: ϧⲉⲛ ⲟⲩⲙⲉⲧⲁⲧϣⲓⲃϯ.

Ⲕⲁϯ ⲟⲩⲟϩ ϭⲓⲥ̀ⲃⲱ: ⲛⲓⲟⲩⲣⲱⲟⲩ ⲛ̀ⲧⲉ ⲡ̀ⲕⲁϩⲓ: ⲙⲁⲱ̀ⲟⲩ ⲙ̀ⲡⲉϥⲣⲁⲛ: ⲉⲩϩⲱⲥ ⲙ̀ⲡⲉϥⲁ̀ⲙⲁϩⲓ.
Ⲗⲓⲧⲟⲩⲣⲅⲟⲥ ⲛⲓⲃⲉⲛ: ⲛⲉⲙ ⲛⲓⲧⲁⲅⲙⲁ ⲛ̀ⲉ̀ⲡⲟⲩⲣⲁⲛⲓⲟⲛ: ⲁ̀ⲣⲓⲯⲁⲗⲓⲛ ⲙ̀Ⲡⲟ̅ⲥ̅: Ⲫϯ ⲛ̀ⲧⲉ ⲡ̀ⲱ̀ⲟⲩ.

Ⲙⲁⲣⲟⲩⲥ̀ⲙⲟⲩ ⲉ̀ⲣⲟϥ: ⲛ̀ϫⲉ ⲛⲓⲗⲁⲟⲥ ⲧⲏⲣⲟⲩ: ⲛⲓϫⲁϫⲓ ⲛ̀ⲧⲉ ϯⲉⲕⲕ̀ⲗⲏⲥⲓⲁ̀: Ⲡⲟ̅ⲥ̅ ⲁⲕϣ̀ⲧⲉⲣⲧⲟⲣⲟⲩ.
Ⲛⲓⲭ̀ⲣⲓⲥⲧⲓⲁ̀ⲛⲟⲥ: Ⲡⲓ̅ⲥ̅ⲗ̅ ⲙ̀ⲃⲉⲣⲓ: ⲛⲁϩⲙⲟⲩ ϧⲉⲛ ⲧⲉⲕϫⲓϫ: ⲛ̀ⲟⲩⲓ̀ⲛⲁⲙ ⲉⲧϫⲱⲣⲓ.

Ⲝⲙⲁⲣⲱⲟⲩⲧ ⲛ̀ⲑⲟⲕ: ϧⲉⲛ ⲛⲉⲕϩ̀ⲃⲏⲟⲩⲓ̀ ⲧⲏⲣⲟⲩ: ⲙⲁϫⲟⲙ ⲛⲁⲛ Ⲫϯ: ⲉ̀ϫⲉⲛ ⲛⲉⲛϫⲁϫⲓ.
Ⲟⲩⲁ̀ⲣⲱⲙⲁⲧⲁ: ⲡⲉⲕⲣⲁⲛ ϧⲉⲛ ϯⲕ̀ⲧⲓⲥⲓⲥ: ϣⲱⲡⲓ ⲛⲁⲛ ⲛ̀ⲣⲉϥⲛⲟϩⲉⲙ: ϧⲉⲛ ϯⲁ̀ⲛⲁⲥⲧⲁⲥⲓⲥ.

Ⲡⲟ̅ⲥ̅ ⲛ̀ⲧⲉ ⲛⲓϫⲟⲙ: ϣⲉⲛϩⲏⲧ ϧⲁ ⲧⲁⲙⲉⲧϫⲱⲃ: ϭⲓⲥ̀ⲙⲏ ⲉ̀ⲡⲁϯϩⲟ: Ⲫϯ ⲛ̀Ⲓⲁⲕⲱⲃ.
Ⲣⲉⲕ ⲡⲉⲕⲙⲁϣϫ Ⲫϯ: ⲉ̀ⲧⲁⲡ̀ⲣⲟⲥⲉⲩⲭⲏ: ϧⲉⲛ ⲧⲉⲕⲡⲁⲣⲟⲩⲥⲓⲁ̀: ⲥⲱϯ ⲛ̀ⲧⲁⲯⲩⲭⲏ.

Ⲥⲉⲙⲛⲉ ⲛⲟⲙⲟⲥ ⲛⲏⲓ: ⲉ̀ⲡⲓⲙⲱⲓⲧ ⲛ̀ⲧⲉ ⲡ̀ⲱⲛϧ: ⲛ̀ⲧⲉⲛⲥ̀ⲙⲟⲩ ⲉ̀ⲡⲉⲕⲣⲁⲛ: ⲡ̀ϣⲏⲣⲓ ⲙ̀Ⲫϯ ⲉⲧⲟⲛϧ.
Ⲧⲉⲛⲟⲩⲱⲣⲡ ⲛⲁⲕ ⲙ̀ⲡⲓⲥ̀ⲙⲟⲩ: ⲛⲉⲙ ⲡⲓⲱ̀ⲟⲩ ϣⲁ ⲉ̀ⲛⲉϩ: ⲫⲱⲕ ⲡⲉ ⲡⲓⲁ̀ⲙⲁϩⲓ: ⲛⲉⲙ ⲡ̀ⲧⲁⲓⲟ̀ ⲓⲥϫⲉⲛ ⲡ̀ⲉ̀ⲛⲉϩ.

Ⲩⲙⲛⲟⲗⲟⲅⲓⲁ̀ ⲛⲓⲃⲉⲛ: ϥ̀ⲉⲣϣⲁⲩ ⲛⲁⲕ Ⲫϯ: ⲛⲓⲙ ⲉⲧⲟ̀ⲛⲓ ⲙ̀ⲙⲟⲕ: Ⲫϯ ⲛ̀ⲧⲉ ⲛⲉⲛⲓⲟϯ.
Ⲫϯ ⲡⲓⲙⲁⲓⲣⲱⲙⲓ: ⲛⲁϩⲙⲉⲛ ϧⲉⲛ ⲡⲉⲕⲣⲁⲛ: ⲛⲉⲙ ⲧⲉⲕⲙⲉⲧϣⲉⲛϩⲏⲧ: ⲁ̀ⲣⲓⲟⲩⲛⲁⲓ ⲛⲉⲙⲁⲛ.

Ⲭⲱ ⲛⲏⲓ ⲧⲁⲙⲉⲧⲕⲟⲩϫⲓ: ϩⲓⲛⲁ ⲛ̀ⲧⲉⲕⲙ̀ⲧⲟⲛ ⲙ̀ⲙⲟⲓ: ⲱ̀ⲟⲩⲛ̀ϩⲏⲧ ⲉ̀ϫⲱⲓ: ⲟⲩⲟϩ ⲙ̀ⲡⲉⲣⲧⲁⲕⲟⲓ.
Ⲯⲩⲭⲏ ⲛⲉⲙ ⲛⲉⲛⲥⲱⲙⲁ: ⲥⲱϯ ⲙ̀ⲙⲱⲟⲩ ⲡⲉⲛⲛⲏⲃ: ⲥⲱⲗϫ ⲛ̀ⲛⲉⲛⲁ̀ⲛⲟⲙⲓⲁ̀: ⲉⲑⲃⲉ ⲧⲉⲕⲙⲉⲧⲛⲏⲃ.

Ⲱ̀ ⲡⲓⲙⲁⲛⲉ̀ⲥⲱⲟⲩ: Ⲫϯ ⲛ̀ⲧⲉ ⲛⲓϫⲟⲙ: ⲣⲱⲓⲥ ⲉ̀ⲣⲟⲛ ⲟⲩⲟϩ ⲛⲁϩⲙⲉⲛ: ⲉ̀ⲃⲟⲗϧⲉⲛ ⲡⲓⲭ̀ⲣⲱⲙ.
Ϣⲁ ⲛ̀ⲧⲉⲛⲥ̀ⲙⲟⲩ ⲉ̀ⲣⲟⲕ: Ⲫϯ ⲡⲉ ⲡⲉⲛⲃⲟⲏ̀ⲑⲟⲥ: ⲧⲉⲛⲛⲁϩϯ ϫⲉ ⲛ̀ⲑⲟⲕ: ⲡⲉ Ⲫϯ ⲁ̀ⲗⲏⲑⲱⲥ.

Ϥ̀ⲉⲣϣⲁⲩ ⲛⲁⲕ ⲙ̀ⲡⲓⲥ̀ⲙⲟⲩ: ϧⲉⲛ ⲣⲱⲟⲩ ⲛ̀ⲟⲩⲟⲛ ⲛⲓⲃⲉⲛ: ϫⲉ ⲛ̀ⲑⲟⲕ ⲡⲉ ⲡⲓⲣⲉϥⲥⲱⲛⲧ: ⲛ̀ⲧⲉ ϯⲕ̀ⲧⲓⲥⲓⲥ ⲧⲏⲣⲥ.
Ϧⲉⲛ ⲧⲉⲕⲙⲉⲧⲭ̅ⲣ̅ⲥ̅: ⲁ̀ⲣⲓϩ̀ⲙⲟⲧ ⲛⲁⲛ ⲡⲉⲛⲛⲟⲩϯ: ⲉⲑⲣⲉⲕⲥⲱϯ ⲙ̀ⲙⲟⲛ: ϧⲉⲛ ⲡⲓⲉ̀ϩⲟⲟⲩ ⲛ̀ϩⲟϯ.

Ϩⲓⲛⲁ ⲛ̀ⲧⲉⲛϩⲱⲥ: ⲉ̀ⲡⲉⲕⲣⲁⲛ ⲉⲧⲥ̀ⲙⲁⲣⲱⲟⲩⲧ: ⲱ̀ ⲫⲏⲉ̀ⲧⲁϥϣⲱⲡⲓ ⲛ̀ⲣⲱⲙⲓ: ⲁϭⲛⲉ ⲥ̀ⲡⲉⲣⲙⲁ ⲛ̀ϩⲱⲧⲡ.
Ϫⲉ ⲁ̀ⲛⲟⲛ ⲡⲉ ⲡⲉⲕⲗⲁⲟⲥ: ⲧⲉⲛϣⲟⲩϣⲟⲩ ⲙ̀ⲙⲟⲛ ϧⲉⲛ ⲡⲉⲕⲣⲁⲛ: ⲛⲁϩⲙⲉⲛ ϧⲉⲛ ⲛⲉⲛϩⲟϫϩⲉϫ: ⲟⲩⲟϩ ⲥⲱⲧⲉⲙ ⲉ̀ⲣⲟⲛ.

Ϭⲓⲙⲱⲓⲧ ⲛⲁⲛ ⲡⲉⲛⲛⲟⲩϯ: ⲉ̀ⲡⲓⲙⲱⲓⲧ ⲉⲧⲥⲟⲩⲧⲱⲛ: ⲉⲑⲃⲉ ⲧⲉⲕⲙⲉⲧⲟ̅ⲥ̅: ⲙ̀ⲡⲉⲣϩⲓ ⲡ̀ϩⲟ ⲙ̀ⲙⲟⲛ.
Ϯⲛⲁⲛ ⲛ̀ⲟⲩⲥⲟⲫⲓⲁ̀: ϫⲉ ⲛ̀ⲑⲟⲕ ⲟⲩⲕⲁⲧϩⲏⲧ: ⲟⲩⲱ̀ⲟⲩⲛ̀ϩⲏⲧ ⲉ̀ϫⲱⲓ: ⲉⲑⲃⲉ ⲛⲉⲕⲙⲉⲧϣⲉⲛϩⲏⲧ.